Piden atender as enfermidades mentais como un problema de saúde pública

O presidente de Saúde Mental FEAFES Galicia, Xosé Ramón Girón, fixo un chamamento á sociedade galega e ás administracións para acabar cos prexuízos con este colectivo e pediu encarar esta doenza como un problema de “saúde pública”.

Así o pediu durante o acto de inauguración da nova sede de saúde mental FEAFES Galicia e na conmemoración do Día Mundial da Saúde Mental ao que asistiron o presidente da Xunta, Alfonso Rueda; o conselleiro de Sanidade, Julio García Comesaña e a alcaldesa de Santiago, Goretti Sanmartín, entre outras autoridades.

O presidente de FEAFES puxo en valor os pasos dados cara a unha percepción social máis normalizada, rompendo estereotipos e ideas erróneas sobre as persoas con problemas de saúde mental, aínda que aínda queda traballo por facer.

Segundo Girón, é responsabilidade de todos “restaurar a dignidade e a autoestima” deste colectivo impulsando unha sociedade “libre de estigmas” nun momento no que “parte da sociedade aínda ten prexuízos”.

Así, reivindicou unha mellor atención ás súas necesidades e unha integración plena e normalizada na sociedade.

Actualmente, a federación congrega 12 asociacións que teñen presenza en máis de 30 localidades galegas, atendendo a unha poboación diana de 68.000 persoas e logrando, ao longo da súa traxectoria, dar resposta ás necesidades de máis de 10.000 persoas con problemas de saúde mental e familiares.

Pola súa banda, o presidente da Xunta, Alfonso Rueda, puxo en valor o compromiso do Goberno galego coa saúde mental, que se reflicte no Plan galego de actuación neste ámbito ata 2024, dotado con 80 millóns de euros.

Segundo o presidente galego, esta estratexia permitiu incrementar os recursos, prazas e servizos dispoñibles para estas persoas a pesar de que, admitiu, aínda “queda moito por facer”.

Na súa intervención asegurou que a Xunta xa traballa no Plan de Saúde mental “a partir de 2024” para o que requiriu as achegas das entidades expertas neste campo que son os que “coñecen de verdade” as necesidades.

Ademais, Rueda tamén incidiu na aposta da Xunta por reforzar o persoal especializado en saúde mental e reiterou que cos orzamentos de 2024 completarase a creación de 240 prazas nestes servizos, tal e como avanzou esta semana no Debate de política xeral do Parlamento galego.