O accidente aéreo de Corea do Sur deixa 179 vítimas mortais e dous sobreviventes
O accidente aéreo de Corea do Sur deixa 179 vítimas mortais e dous sobreviventes
O avión de Jeju Air, con 181 persoas a bordo, bateu contra un valo cando aterraba no aeroporto de Muan, no suroeste do país
As primeiras hipóteses apuntan a un problema no tren de aterraxe, que non despregou, ao parecer polo impacto cun paxaro
Trátase da traxedia aérea cun maior número de vítimas mortais ocorrida en territorio surcoreano
O accidente aéreo no aeroporto internacional de Muan, en Corea do Sur, deixa un balance definitivo de 179 persoas mortas e dúas feridas graves, as únicas que sobreviviron ao impacto do aparello contra un valado.
O avión de Jeju Air tentou facer dúas veces unha aterraxe de emerxencia. Na segunda tentativa, o aparello tocou chan sen o tren de aterraxe, e os 2.800 metros da pista non foron suficientes para paralo.
Esnafrouse a gran velocidade contra o peche das instalacións e ao chocar estourou e incendiouse. A bordo ían seis membros da tripulación e 175 pasaxeiros, 173 de orixe coreana e dous de Tailandia. A maioría tiña entre 40 e 60 anos.
Os bombeiros conseguiron nun primeiro momento rescatar dúas persoas con vida, pero feridas de gravidade. Ao parecer son dous membros da tripulación, un home e unha muller, que viaxaban na cola do avión.
A primeira hora da tarde, os equipos de salvamento confirmaron a morte do resto de persoas que ían no avión, en total, 179. Moitas saíron despedidas tras a colisión.
Os bombeiros tentan sufocar as lapas. Yonhap vía REUTERS
Ningún accidente previo
O avión sinistrado, un Boeing 737, pertencía a Jeju Air, unha empresa de baixo custe que ata hoxe non tivera ningún accidente mortal. O voo unía o aeroporto tailandés de Bangkok co surcoreano de Muan.
As autoridades locais din que antes do accidente, a torre de control avisoulle ao avión do impacto de paxaros contra os motores. Pouco despois, os pilotos lanzaron unha mensaxe de socorro e fixeron a aterraxe que rematou en traxedia.
Eran pouco despois das nove en Corea do Sur, a unha da mañá en Galicia, cando o avión estoupaba diante da xente que agardaba no aeroporto.
Só sobreviviron dous membros da tripulación. Yonhap vía REUTERS
Investigación
Polo momento as autoridades, que xa investigan o sinistro, cren que a causa do accidente podería ser o fallo para despregar o tren de aterraxe e outros mecanismos de freado, posiblemente debido a unha colisión cun paxaro.
As dúas caixas negras xa foron localizadas pero, segundo o Ministerio de Transporte surcoreano, a gravadora de datos de voo (FDR) sufriu danos, polo que descodificala levaría entre un e seis meses.
Ata o de agora, o accidente supuxo a despregadura duns 2.800 efectivos dos corpos de bombeiros, policía, Forzas Armadas e Garda Costeira.
As autoridades mobilizaron máis de 2.800 efectivos. REUTERS/Kim Hong-Ji
A peor traxedia aérea en Corea do Sur
O deste domingo é o accidente aéreo con maior número de vítimas mortais ocorrido en territorio surcoreano e o terceiro con compañías do país involucradas.
No 1983, un caza soviético derrubou un Boeing 747 de Korean Air e faleceron as 269 persoas que ían a bordo. No 1997, outro dos seus aparellos estrelouse na illa de Guam, cun saldo de 229 vítimas mortais e 25 sobreviventes.
Sete días de loito nacional
O presidente interino surcoreano, Choi Sang-mok, decretou o condado de Muan como zona especial afectada por un desastre ao visitar o lugar do accidente e anunciou sete días de loito nacional, ademais de ofrecer as súas condolencias ás familias das vítimas.
