Ascenden a 94 os falecidos no naufraxio dun barco en Mozambique

Son xa  94 persoas as falecidas no naufraxio dun barco en Mozambique. Entre as vítimas mortais hai numerosos nenos, segundo informan as autoridades daquel país.

"Era unha embarcación pequena que transportaba 130 pasaxeiros. O barco non tiña capacidade para transportar estas persoas e afundiuse", afirmou o secretario de Estado de Nampula, Jaime Neto, a última hora do domingo.

Neto explicou que 91 das vítimas foron xa identificadas. Mentres, o administrador da illa de Mozambique (en cuxas augas ocorreu a traxedia), Silvério Nuaito, aclaraba que se busca aínda os desaparecidos.

"Hai once sobreviventes nas unidades sanitarias. Non é fácil dicir con precisión cantos están desaparecidos, a procura continúa"

O Goberno da provincia afirmou nun comunicado que lamenta a perda de vidas e que se solidariza coas familias afectadas pola traxedia. "As autoridades marítimas e administrativas seguen comprometidas coa identificación dos cadáveres e a localización dos seus familiares, así como coa asistencia aos sobreviventes", sinalou o executivo provincial.

More than 90 people died when an overcrowded makeshift ferry sank off Mozambique's north coast, authorities said Sunday. They said the converted fishing boat carrying about 130 people ran into trouble as it tried to reach an island off Nampula province
➡️ https://t.co/hSdtoLhJR2

— AFP News Agency (@AFP) April 7, 2024

Os datos preliminares indican que a embarcación se desprazaba entre o posto administrativo de Lunga, no distrito de Mossuril, e a illa de Mozambique, cando envorcou ao ser golpeada por unha onda.

Vídeos difundidos en redes sociais mostran decenas de cadáveres tendidos nunha praia da illa. Segundo Neto, as vítimas tentaban escapar da zona debido ao pánico causado por desinformacións sobre un gromo de cólera.

O país sofre o maior gromo de cólera dos últimos 25 anos

O país do leste de África rexistrou 14.877 casos da enfermidade e 32 mortes desde outubro pasado, segundo as últimas cifras publicadas polo Goberno. De acordo co Fondo das Nacións Unidas para a Infancia (Unicef), Mozambique sofre actualmente o seu "maior gromo de cólera dos últimos 25 anos".

A Organización Mundial da Saúde (OMS) advertiu o pasado febreiro dunha grave repunta de casos de cólera este xaneiro en dez países do leste e do sur de África e de que existe un risco notable de que a enfermidade se estenda aínda máis e cause unha epidemia.

Os países máis afectados son Zambia e Zimbabue, mentres que Mozambique, Tanzania, a República Democrática do Congo, Etiopía e Nixeria reportaron focos activos de cólera, cun total de 26.000 casos e 700 mortes.

O cólera é unha enfermidade diarreica aguda causada pola inxestión de alimentos ou auga contaminados coa bacteria Vibrio cholerae.