Portugal elimina as peaxes nas autovías, incluídas as que conectan con Galicia
Portugal elimina as peaxes nas autovías, incluídas as que conectan con Galicia
Desde o un de xaneiro xa non haberá que pagar os actuais dous euros e 40 céntimos por ir de Galicia ao Porto en coche
Cando se crearon, chamáronlles SCUT, as siglas de Sen Custo para o Utilizador.
Eran autovías libres de peaxe como a A-28, que une Camiña co Porto por Viana do Castelo.
Os galegos atoparon nela unha alternativa de balde á autoestrada que vertebra o norte do país.
Pero as cousas mudaron en 2011: en pleno rescate financeiro, Europa impón o cobro dunha peaxe tamén nestas vías.
13 anos despois, a situación volve ao punto inicial.
A proposición presentouna o Partido Socialista. Apoiárona o resto de grupos da esquerda e, a última hora, tamén os 50 deputados do ultradereitista Chega.
A medida suporá o retorno da gratuidade a media ducia de autovías portuguesas, entre elas a A-24 (que conecta Viseu con Chaves e Verín) e a A-28.
Desde o un de xaneiro, xa non haberá que pagar os actuais dous euros e 40 céntimos por ir de Galicia ao Porto en coche.
Para os transportistas, o aforro será aínda maior: a peaxe para os vehículos de maior tonelaxe é hoxe de algo máis de 6 euros.
Rematan tamén as multas coas que teñen que lidar os condutores inadvertidos que cruzan baixo os arcos de cobro automático.
O Goberno portugués do Partido Socialdemócrata encaixa a súa primeira gran derrota a dous meses da chegada ao poder cunha medida que deixará o Estado sen 157 millóns de euros anuais.
