A presidenta do Perú chama a "pasar páxina" tras declarar polos reloxos de luxo

A presidenta do Perú, Dina Boluarte, pediulle á poboación "pasar páxina" tras a denuncia presentada na súa contra pola presunta posesión de reloxos e xoias de luxo, polas que respondeu este venres durante máis de cinco horas ante a Fiscalía.

Nunha intervención ofrecida ante a prensa no Palacio de Goberno de Lima, Boluarte negou ter reloxos da marca Rolex e outras xoias valoradas en miles de dólares e dixo que foi un préstamo do gobernador da rexión sureña de Ayacucho, Wilfredo Oscorima, que xa devolveu.

Segundo a gobernante, a cidadanía agardaba "saber a verdade sobre os reloxos e as xoias despois de tantas noticias tendenciosas e falsas" que, afirmou, publicou un sector da prensa.

"Debo recoñecer que foi unha equivocación aceptar en calidade de préstamo estes reloxos do meu amigo Wilfredo Oscorima (...) no ánimo de representar ben ao país".

Asegurou que "todo o que dixeron é falso" antes de mostrar unha pulseira, un colar e pendentes que, subliñou, son "de bixutería fina" e de prata, respectivamente.

Logo engadiu que no 2018 adquiriu un vehículo con cartos dos seus aforros e produto do seu "traballo lícito".

Recomendación do seu avogado

A mandataria tamén dixo que "o responsable" da súa demora en dar explicacións públicas foi o seu avogado, Mateo Castañeda, quen lle recomendou declarar primeiro ante a autoridade competente e despois dirixirse ao país.

Pediulle á fiscalía "que sexa máis prudente cando cualifique as súas denuncias e non se converta en mesas de parte dunha prensa tendenciosa" e aos seus compatriotas "pasar esta páxina" para ocuparse "do que realmente importa que é a axenda nacional".

"Basta de seguir operando con mans negras en contra do país, con estas mentiras e cortinas de fume que non benefician a ninguén e só lle fan dano á patria, á imaxe internacional tan necesaria para que veñan os investimentos. Somos un goberno de feitos e non de esperanzas falsas", concluíu.

Boluarte declarou este venres ante o fiscal xeral interino, Juan Carlos Villena, sobre os reloxos de luxo e as xoias non declaradas, obxecto dunha investigación preliminar por un presunto enriquecemento ilícito e omisión de consignar declaración en documentos.