O presunto autor do crime de Baiona, en prisión co protocolo de prevención de suicidio

Primeira noite no cárcere do acusado de matar a súa exmuller en Baiona. Tras descartar os psiquiatras que estivese catatónico e malia gardar silencio na súa comparecencia ante a xuíza, esta decretou o seu ingreso na prisión da Lama. Os forense aconsellaron aplicar o protocolo de prevención do suicidio e que ingresara na enfermería.

Ángel Rodríguez da Costa foi trasladado este xoves ao cárcere da Lama sen pronunciar unha soa palabra sobre o crime da súa exmuller do que o acusan. Desde que foi detido o luns mantivo o mutismo. Ante a sospeita de que estivese catatónico, o mércores pola tarde a xuíza ordenou o seu traslado ao hospital para realizarlle unha avaliación psiquiátrica. Os especialistas conclúen que estaba apto e que non tiña ningunha patoloxía que lle impedira declarar.

Pola mañá levárono de novo ante a titular do Xulgado de Violencia sobre a muller de Vigo para tomarlle declaración. Mantivo silencio absoluto, pero non foi impedimento para que a xuíza decretara o seu ingreso en prisión provisional comunicada e sen fianza. Ademais prohibiulle comunicarse e achegarse aos seus fillos de 7 e 9 anos, que presenciaron como matou presuntamente á nai o domingo á tarde.

O suceso aconteceu no barrio da Percibilleira, en Baiona, onde o investigado ía deixar os nenos coa nai tras pasar a fin de semana con eles cando cometeu o crime. Asestoulle un golpe mortal na cabeza e provocoulle cortes por todo o corpo, e despois de deixar os nenos cos avós paternos fuxiu. O luns pola mañá entregouse na comisaría da Policía Nacional en Ourense.

Non tiña denuncias previas por maltrato. A vítima e o seu presunto asasino tiveran recentemente un xuízo pola custodia e a patria potestade dos nenos.