Primeiro día de campaña electoral no País Vasco
Primeiro día de campaña electoral no País Vasco
Este venres chegan algúns líderes dos partidos estatais para apoiar os seus candidatos
Será a campaña máis disputada dos últimos anos, co PNV e Bildu pugnando por ser a forza máis votada.
O PNV comezou a campaña en Vitoria. Aspiran a manter o goberno cun novo candidato a lehendakari, Imanol Pradales. Pediulles aos cidadáns que o 21 de abril escollan experiencia e estabilidade.
O outro partido que combate polo liderado, segundo todas as enquisas, Bildu, chama os vascos a votaren cambio para rexenerar a política despois de tantos anos co PNV no goberno.
Os socialistas aspiran a ser clave para decidir quen goberna. Xa se manifestaron a favor de repetir a coalición co PNV e preséntanse como garantía de aplicación de políticas progresistas.
O PP preséntase como única alternativa ao que denominan "un multipartito sanchista". Din que eles son a única papeleta do cambio.
Outro punto de atención está en Sumar e Podemos, en pugna por representaren a esquerda non independentista.
E Vox tentará darlles a volta ás enquisas, que din que desaparece do Parlamento vasco.
Este venres comezan a chegar a Euskadi os líderes nacionais para apoiar os seus candidatos. Máis do 30 % dos vascos, segundo o CIS, decidirán o seu voto na última semana de campaña.
