Que hai de certo na suposta conexión especial entre irmáns xemelgos?
Que hai de certo na suposta conexión especial entre irmáns xemelgos?
A ciencia di que existe, pero que é a mesma que se dá en calquera outro grupo de persoas moi próximas
Hoxe queremos saber que hai de certo na suposta conexión especial entre irmáns xemelgos. Para estes irmáns esta conexión é indiscutible. A ciencia di que existe, pero que é a mesma que se dá en calquera outro grupo de persoas moi próximas que compartan vivencias e lembranzas.
Un de cada 42 bebés que nacen no mundo chega cun dobre ao seu carón, un irmán xemelgo. Supoñen máis de millón e medio de nacementos ao ano e, desde hai tres décadas, nacen máis debido ás técnicas de reprodución asistida e aos embarazos serodios.
A finais do século XIX a sociedade converteunos en atracción de feira e no vinte o cine usounos como elemento cando menos inquietante. É a reacción ante o desconcerto, ante o inexplicable.
A NASA, o FBI e tristemente, os nazis interesáronse polos xemelgos, unha curiosidade vixente na actualidade, coa ciencia intentando explicar a suposta habilidade especial para comunicarse entre eles.
