Recuperan a áncora do Serpent, naufragado en 1890, que un veciño de Muxía utilizaba como decoración na casa

Axentes da Garda Civil recuperaron unha áncora que podería proceder dun dos grandes naufraxios  na historia da Costa da Morte, o do buque HMS Serpent no século XIX. A traxedia do barco da Royal Navy en 1890 con 175 tripulantes a bordo, fronte ás costas de Camariñas, deu lugar a que se creara o cemiterio dos Ingleses.

A recuperación da peza produciuse  despois de comprobar que un veciño a utilizaba para decorar a fachada dunha vivenda en Muxía.

A investigación comezou en xuño deste ano por mor dunha denuncia presentada no posto de Muxía. O denunciante aseguraba que un veciño da localidade exhibía na súa casa unha áncora procedente do naufraxio do HMS Serpent, un buque da Royal Navy afundido en 1890 fronte á costa camariñá.

Para comprobar estes feitos, a Garda Civil solicitou un informe á área de Patrimonio Cultural Subacuático para a zona norte da Federación Española de Actividades Subacuáticas.

A análise determinou que a áncora localizada é de tipo «almirantado», unha variedade de áncora utilizada frecuentemente pola Royal Navy no século XIX.

A ancora foi extraída na zona do cabo Vilán, hai ao redor de 25 anos, cando un barco de pesca a enganchou coas súas redes. Ao tratar de recuperala, xa preto da superficie, os aparellos romperon e a áncora volveu ao fondo, polo que o patrón do barco anotou as coordenadas, para que outro buque de maior calado a recollese ao día seguinte.

O agora investigado fíxose coa áncora con posterioridade e empregouna para decorar a súa vivenda. Por este motivo, a Garda Civil, incluíndo especialistas do Servizo de Protección da Natureza (Seprona), o investiga agora como presunto autor dun delito contra o patrimonio histórico.

Naufraxio histórico

O HMS Serpent, foi un cruceiro torpedeiro británico de case 2.000 toneladas de desprazamento que entrou en servizo na Royal Navy en 1888. A embarcación, baixo o mando do comandante Harry L. Ross, viu o seu final a fatídica noite do 10 de novembro de 1890.

Aquel día, no medio dunha forte tormenta e quizais debido a un erro de navegación, a nave encallou e foi a pique con case toda a súa dotación: en total, faleceron 172 dos seus 175 tripulantes. Os restos do buque quedaron espallados pola costa e os seus tripulantes foron enterrados no cemiterio dous Ingleses, nas inmediacións de cabo Vilán. Segundo a normativa vixente, os restos de naufraxios anteriores a 1901 son considerados patrimonio cultural protexido. A lexislación establece que calquera obxecto localizado e extraído sen autorización deberá de ser comisado e posto ao dispor do ministerio competente en materia de patrimonio cultural.

Xunto á áncora, que presumiblemente pertence ao naufraxio do HMS Serpent, os axentes localizaron outras dúas áncoras cuxa orixe tamén está a ser investigada. Por orde do Xulgado de Primeira Instancia e Instrución número 2 de Corcubión, as áncoras foron trasladadas e depositadas no Museo de Man, en Camelle, onde serán preservadas mentres se realiza unha análise máis detallada.

A Garda Civil lembra a importancia de respectar e protexer o patrimonio histórico e cultural e fai un chamamento á cidadanía para que denuncie calquera actividade sospeitosa que poida poñer en perigo este legado.

O home que a tiña na súa casa como decoración é un armador xubilado.