Rubiales nega irregularidades no contrato da Supercopa: "Salvouse o fútbol"

O expresidente da Real Federación Española de Fútbol (RFEF) Luis Rubiales declarou este luns durante máis de catro horas no Xulgado de Instrución número 4 de Majadahonda (Madrid), no que negou calquera irregularidade nos contratos da RFEF que se investigan, como o que trasladou a celebración da Superopa a Arabia Saudita. Mesmo afirmou que con eses contratos "salvouse o fútbol"

O expresidente federativo admitiu que a súa saída da RFEF salpicado polo escándalo que supuxo o bico non consentido que deu a Jenni Hermoso polo que está acusado de agresión sexual e coaccións, foi "traumática" e explicou que decidiu investir en República Dominicana porque lle pareceu unha boa oportunidade.

Durante a súa declaración, na que se acordaron ata dous recesos, o expresidente da RFEF defendeu a xestión que levou a Supercopa a Arabia Saudita, un contrato que se traduciu en "diñeiro para os clubs".

Asegurou que a Federación non pagou ningunha comisión a Kosmos, empresa do exxogador Gerard Piqué, pola "intermediación" coa empresa saudita Sela e que a oferta desta sociedade foi a mellor. 

O expresidente recalcou que ese contrato asínase no medio dunha pandemia na que, de non conseguir eses ingresos, o fútbol español podería morrer e sacou peito da súa xestión, ao lograr aumentar a facturación de 140 a 400 millóns de euros e conseguir que a España lle asignen o Mundial de 2030.

O contacto con Kosmos non o estableceu a Federación, senón Piqué, que tamén foi quen contactou coa empresa árabe Sela, e entre eles negociarían a comisión do entón futbolista. "Non houbo un contubernio", insistiu Rubiales, quen lembrou que o contrato recibiu o visto e prace do comité ético e o departamento de Compliance do ente federativo. 

Rubiales explicou á xuíza que, cando chegou á RFEF, a Supercopa non interesaba a ninguén e, grazas ao cambio de modelo, agora xera 40 millóns de euros. Cando se cambiou o formato dun partido único a catro participantes, recibiron "moitas chamadas" e interesáronse en Qatar, China, Rusia ou India, ademais de Arabia Saudita.

O primeiro acordo cos árabes frustrouse porque romperon a cláusula de confidencialidade e entón Piquei mediou para retomalo e a RFEF conseguiu 40 millóns de euros anuais. "Ese diñeiro salvou o fútbol porque o fútbol en pandemia morría", recalcou.

Rubiales asegurou que o entón secretario xeral da Federación, Andreu Camps, deu o visto e prace a xogar a Supercopa fóra de España (antes do traslado a Arabia xa se probou en Marrocos), algo para o que tamén se pediu permiso a FIFA.

Respecto ás obras no estadio sevillano da Cartuja, adxudicadas á empresa Gruconsa e tamén no foco da investigación, Rubiales explicou que a RFEF, como entidade privada podía contratar a quen quixese, aínda que indicou que falaron coa Junta de Andalucía e pedíronlles que achegasen "algo de diñeiro" para acondicionar o estadio.

Defendeu que o someteu ao comité económico e aludiu a un informe técnico do departamento de eventos que indicaba que tiña que ser Gruconsa quen fixese as obras porque xa se lle encomendou en 2020 unha auditoría técnica das deficiencias do estadio.

Rubiales explicou que se a RFEF fixera un concurso, unha nova empresa tiña que realizar ese informe técnico e todo o traballo previo que xa fixera Gruconsa, aínda que indicou que o avogado e asesor Tomás González Cueto, tamén investigado, aconselloulle facer todo "tal e como din as leis de contratación pública para darlle a máxima transparencia".

Tamén indicou que cando saíu da RFEF tentou entrar nos negocios de explotación hostaleira do seu amigo, o exfutbolista Francisco Javier Martín Alcaide, Nene, que "coñece moi ben a República Dominicana". "Eu non sei do negocio, el é o que xestiona", asegurou, á vez que negou coñecer se Gruconsa tiña negocios no país caribeño.

Á empresa Dismatec -vinculada ao seu amigo Meniño e que recibiría, presuntamente, pagos desde Gruconsa, coñeceuna cando se constituíu a sociedade Actividades Nazaríes.

A xuíza que investiga posibles irregularidades en contratos da Real Federación Española de Fútbol  permitiu a Rubiales conservar o seu pasaporte, pero ordenoulle que informe e pida permiso ao xulgado se quere viaxar fóra de España. Ademais, imponlle comparecencias quincenais perante o xulgado.