Rueda e o alcalde de Lugo comprométense a colaborar con lealdade institucional
Miguel Fernández solicita unha reunión para abordar proxectos pendentes como o Museo da Romanización ou o Plan Paradai
O presidente da Xunta promete “boas noticias” para Lugo nas próximas semanas
O presidente da Xunta, Alfonso Rueda, e o novo alcalde de Lugo, Miguel Fernández, expresaron este martes a súa vontade de manter unha relación baseada na colaboración e lealdade institucional, durante o primeiro encontro que manteñen desde a chegada de Fernández á alcaldía.
O encontro tivo lugar durante a visita de Rueda ao Centro de Recuperación de Fauna Silvestre do Veral, en Lugo. Fernández destacou que esta coincidencia podería marcar o inicio dunha "etapa frutífera" de cooperación entre ambas administracións.
Reivindicacións e proxectos pendentes
O rexedor lucense aproveitou a ocasión para solicitar unha reunión de traballo co presidente da Xunta para abordar cuestións pendentes na cidade. Entre elas citou o Museo da Romanización, o Plan Paradai e as obras no barrio da Tinería, sobre as que o alcalde reivindicou avances urxentes.
Fernández asegurou que o Concello será "firme" nestas reivindicacións, por consideralas "xustas", e tamén apuntou a posibles demandas financeiras, a prol de conseguir "un trato igualitario con respecto doutras cidades galegas".
Compromiso da Xunta
Alfonso Rueda respondeu que recolle "a luva" e comprometeuse a manter o diálogo. Asegurou que "en breve" haberá boas noticias para Lugo e que haberá tempo para falar dos proxectos que preocupan á cidade.
O presidente galego aproveitou para desexarlle a Miguel Fernández "toda a sorte do mundo" nesta nova etapa como alcalde, cargo que asumiu o pasado marzo tras o falecemento da anterior alcaldesa, Paula Alvarellos.
