Rusia cumpre a súa ameaza e córtalle o gas a Finlandia por non pagar en rublos
Rusia cumpre a súa ameaza e córtalle o gas a Finlandia por non pagar en rublos
Supón o 5 % da enerxía total que consome o país nórdico
Moscova deixara de abastecerlle electricidade hai unha semana
A compañía enerxética finlandesa Gasum confirmou este sábado que o xigante gasístico ruso Gazprom cortoulle a subministración de gas, tal e como anunciara o venres, por non cumprir a súa esixencia de pagar en rublos.
Con esta decisión, Finlandia perde o seu maior provedor de gas natural, xa que Gazprom fornece ao redor do 92 % de todo o gas que consome o país nórdico, sobre todo na industria forestal e no procesamento de produtos químicos. Porén, só supón o 5 % da enerxía total.
Nun intento de reducir a dependencia do gas ruso, hai un mes Finlandia acordou con Estonia alugar de forma conxunta este outono unha terminal flotante de gas natural licuado (GNL), onde se almacenará o gas traído en barcos desde outros países produtores.
Terceiro país da UE
Finlandia é o terceiro país da Unión Europea, tras Polonia e Bulgaria, que deixa de recibir gas ruso por non querer dobregarse ás esixencias de Moscova de pagar en rublos para tentar frear a caída da súa moeda.
No caso de Finlandia, que este mércores presentou formalmente a súa solicitude de ingreso na OTAN facendo caso omiso das ameazas do Kremlin, o corte da subministración de gas súmase ao da electricidade.
Hai xusto unha semana, a compañía enerxética rusa Inter RAO deixou de abastecer electricidade ao mercado finlandés, alegando "problemas para recibir pagos" por mor das sancións europeas. Porén, especialistas do país nórdico achácano a motivos políticos.
