Sánchez propón consensuar medidas contra a covid–19 cos presidentes autonómicos
Sánchez propón consensuar medidas contra a covid–19 cos presidentes autonómicos
Fontes próximas á Moncloa din que non haberá restricións duras
O presidente do Goberno Pedro Sánchez comprometeuse a estudar o vindeiro mércores novas medidas "compartidas" cos presidentes autonómicos ante o "risco real" por causa do auxe da sexta vaga da covid–19, que esixe "intensificar" as actuacións.
Nunha declaración institucional dende a sede da Delegación do Goberno en Barcelona, asegurou que a incidencia a catorce días, superior aos 500 casos por 100.000 habitantes, levouno a convocar unha conferencia de presidentes extraordinaria o mércores 22 de decembro pola tarde de xeito telemático dende o Senado.
Sánchez comprometeuse a acordar de xeito coordinado coas autonomías as medidas complementarias necesarias para atallar a expansión do virus. Malia todo, quixo lanzarlle unha mensaxe de "confianza" e "tranquilidade" á cidadanía.
"Andamos xuntos a parte máis dolorosa do camiño e xuntos imos culminar esta travesía protexendo as vidas e a saúde dos nosos compatriotas".
"Vacinarse, vacinarse, vacinarse"
Subliñou que "as vacinas funcionan" e constitúen "a mellor arma contra o virus". Eloxiou a "portentosa" marcha do ritmo de administración de doses en España, que, segundo dixo, esperta "admiración en todo o mundo", polo que pediu "perseverar" nesta liña: "vacinarse, vacinarse, vacinarse".
"Quero dicir que as vacinas funcionan e esta crise só se pode atallar á luz da ciencia"
Ademais da inmunización, sinalou que existen outras medidas "complementarias" que sempre deron "bos resultados", como o uso da máscara ou de xeles hidroalcohólicos.
Malia ter unha incidencia inferior á dos países da contorna, o presidente do Goberno advirte que estamos ante un "risco certo, real" para a saúde da cidadanía, o cal "esixe" intensificar as accións.
Por este motivo, confirmou que a conferencia de presidentes extraordinaria terá como obxectivo a análise da evolución da pandemia e o estudo de "medidas compartidas" para facerlle fronte. Fontes oficiosas próximas á Moncloa descartan medidas drásticas o mércores como un confinamento ou un novo estado de alarma.
"O virus segue entre nós. O seu combate segue sendo unha prioridade para todas as administracións públicas".
Coordinación coas autonomías
Neste sentido, quixo deixar claro que a coordinación cos gobernos autonómicos vai seguir sendo o camiño, como se fixo nestes "meses longos de pandemia", a través dos consellos de política territorial sanitaria ou a celebración de dezanove conferencias de presidentes.
Pedro Sánchez precisou que a sexta vaga presenta unhas características "diferentes" ás anteriores, especialmente polo avance da vacinación en España, xa que con cifras "notablemente" superiores de contaxios, a hospitalización e a ocupación nas UCI son inferiores ás de hai un ano.
Minuto a minuto
Comeza a comparecencia
"Dada a alta incidencia a catorce días, decidín facer unha convocatoria extraordinaria da Conferencia de Presidentes para o vindeiro mércores 22 de decembro pola tarde. Será en formato telemático e terá como obxectivo a análise da pandemia e o estudo de medidas compartidas".
"Tamén quero dicir que as vacinas funcionan e esta crise só se pode atallar á luz da ciencia".
"Só o venres pasado administráronse medio millón de vacinas en España. Insisto, hai que vacinarse, vacinarse e vacinarse e por iso quero trasladar a nosa gratitude en nome dos españois aos profesionais que están a levar a cabo a vacinación".
"Para min é un orgullo presidir un país de cidadáns responsables e solidarios. Pero ademais da vacinación, hai outras medidas que sempre deron bos resultados como o uso da máscara".
"O virus segue entre nós e de xeito coordinado fomos xestionando a crise a través dos consellos de política territorial sanitario, 18 en vinte meses. E ese debe seguir sendo o camiño e por ese motivo imos convocar a todos os presidentes autonómicos para avaliar novas medidas que se poidan poñer en marcha nas vindeiras semanas".
"Para finalizar, quero transmitir unha mensaxe de tranquilidade e confianza á poboación. Moitas grazas".
