Sobe o risco de pobreza ou exclusión: afecta un de cada catro galegos

O 25,5 % dos galegos estaba en risco de pobreza ou exclusión social en 2023, o que supón case dous puntos porcentuais máis que en 2022, cando á súa vez baixara preto de dous puntos respecto a 2021 (25,2 %), segundo a Enquisa de Condicións de Vida que publica este luns o Instituto Nacional de Estatística (INE).

Pese ao incremento, esta cifra continúa por baixo da media do Estado, xa que no total de España un 26,5 % dos cidadáns está en risco de pobreza ou exclusión, 0,5 puntos máis que en 2022, segundo o indicador denominado Arope, polas súas siglas en inglés (At risk of poverty and/or exclusion).

Entre outras medicións, o INE recolle que un 19,4 % dos galegos está en risco de pobreza (con datos da renda de 2022), 1,4 puntos máis que un ano antes. Ademais, o 8,2 % dos habitantes da Comunidade ten algunha carencia material e social severa, case dous puntos máis que o 6,3 % de 2022.

Con todo, un 7,5 % dos cidadáns vive nun fogar con baixa intensidade no traballo, en comparación co 9,5 % de 2022.

A taxa de risco de pobreza co alugueiro imputado cae ata o 14,7 %, unha décima máis que hai un ano. Este medidor ten en conta os propietarios de vivendas, que non pagan un alugueiro por vivir nas súas casas. En concreto, un 78,1 % dos fogares galegos ten unha vivenda en propiedade e só o 12 % vive cun alugueiro de mercado. O 1,7 % ten un alugueiro por baixo do prezo de mercado e un 8,2 % está nunha vivenda cedida.

A renda media neta por persoa en Galicia subiu ata os 13.147 euros en 2023, un 6,4 % máis, pero continúa por baixo dos 14.082 euros da media española, que creceu un 8,25 %.

Entre outras métricas que recolle a enquisa do INE, o 38,2 % dos galegos non pode permitirse irse de vacacións polo menos unha semana ao ano, máis que o 33,1 % do dato nacional.

Ademais, un 29,1 % non ten capacidade de afrontar gastos imprevistos, fronte ao 37,1 % do total de españois. O 9,2 % dos cidadáns de Galicia recoñece ter atrasos relacionados con pagos de vivenda ou compras, por baixo do 13,6 % da media nacional. Tamén un 8,6 % dos galegos di ter "moita dificultade" para chegar a fin de mes, fronte ao 9,3 % dos españois.