Stellantis reactiva este luns a fábrica de Vigo nas quendas de mañá, tarde e noite

A empresa da automoción viguesa Stellantis reabrirá as súas portas este luns. Está previsto que uns 5.700 empregados regresen á factoría de Balaídos, para traballar xa en todas as quendas de produción. Outros 600 farano o 16 de setembro.

Stellantis en Vigo someteuse nas últimas datas a unha actualización das instalacións para facelas máis seguras para os traballadores. 500 operarios externos, xunto a 300 membros do cadro de persoal traballaron a marchas forzadas para manter as máquinas a punto, acondicionar as naves, vestiarios e as rúas interiores.

O obxectivo é facilitar así mellores condicións laborais e de seguridade para evitarlles riscos aos traballadores. A empresa cubriu a quenda de noite con voluntarios.

A reactivación da factoría viguesa chega nun momento clave, o do novo repartimento de axudas ao sector. A fábrica de Balaídos aspira lograr a plataforma STLA Small, para construír vehículos eléctricos pequenos e máis baratos que os actuais.

Tamén quere fabricar a nova xeración de furgóns eléctricos, un segmento no que xa demostrou unha grande eficiencia. Tamén expón a futura construción dunha gran fábrica de baterías, pero ademais de Vigo tamén o fai Portugal, onde o grupo ten a fábrica de Mangualde e onde os custos de terreo e laborais son menores.