Suspendidas o 40 % das operacións no terceiro día de folga dos médicos
Suspendidas o 40 % das operacións no terceiro día de folga dos médicos
O sindicato convocante, CESM, cifra o seguimento no 62 %
O Sergas calcula que participaron o 15,18 % dos facultativos
A folga dos médicos cumpre o seu terceiro día. O sindicato convocante estima que o seguimento superou o 60 %. A área sanitaria coa maior participación foi a de Ourense, onde chegou ao 85 %, seguida da de Vigo e da de Santiago cun 75 % e 70 % respectivamente. CESM destaca que nesta xornada aumentou a participación entre os facultativos da atención primaria.
O Sergas, pola contra, calcula que o seguimento global foi do 15 %. A folga dos médicos obrigou a suspender este xoves máis de 600 intervencións, que son case o 40 % das que se fan nun día habitual. Tamén se aprazaron case 20.000 consultas e preto de 14.000 probas.
Os médicos reivindican nesta folga melloras laborais. Pídenlles aos representantes do Sergas e da Consellería de Sanidade "compromisos concretos" para desconvocar as mobilizacións. Aos cidadáns pídenlles desculpas polos prexuízos que esta folga lle poida causar pero aseguran que o obxectivo principal é lograr "seguridade para o paciente e dignidade para os profesionais".
