Terceira e derradeira xornada das eleccións presidenciais en Rusia

Rusia celebra este domingo a terceira e última xornada das eleccións presidenciais, en que xa participou máis da metade dos 112 millóns de persoas chamadas ás urnas.

Neste país de once zonas horarias, os colexios abriron ás 20:00 horas do sábado na península de Kamchatka e pechan ás 18:00 no enclave báltico de Kaliningrado, tras o que se coñecerán os primeiros resultados oficiais preliminares.

Segundo informou a Comisión Electoral Central (CEC), o venres e o sábado exerceron o seu dereito ao sufraxio máis do 50 % do censo, e 2,6 millóns fixérono por adiantado, moitos deles soldados e habitantes das rexións ucraínas anexionadas por Rusia.

As primeiras 24 horas de votación estiveron marcadas por unha vintena de incidentes como o lanzamento de cócteis molotov contra colexios electorais e o asperxido de tinta e pintura nas urnas, que invalidaron uns poucos centos de papeletas.

A CEC congratulouse de que nin eses incidentes, nin os ataques cibernéticos "sen precedentes" nin as incursións fronteirizas ucraínas, que deixaron varios mortos, impediran que a cidadanía acudira en masa a votar nas oitavas eleccións presidenciais da historia deste país desde 1991.

Mentres os sociólogos recoñecen que non agardaban tan alta participación, a oposición sospeita que as autoridades recorreron ao recurso administrativo á hora de obrigar a votar ao persoal do sector público, celeiro electoral do candidato do Kremlin, Vladimir Putin.

Mentres a CEC e o Defensor do Pobo ruso negaron a existencia de irregularidades, observadores independentes denunciaron algúns casos de manipulación electoral.

Putin, que conta cunha intención de voto de máis do 80 %, segundo as sondaxes oficiais, podería lograr a súa vitoria electoral máis folgada desde que chegara ao poder no ano 2000.

Os tres rivais

Os seus tres rivais son o representante do partido Xente Nova, Vladislav Davankov, e o comunista Nikolái Jaritónov, que contan co 6 % de apoios entre os enquisados, e o ultranacionalista Leonid Slutski, que se achega ao 5 %.

Malia a advertencia da Fiscalía, a oposición mantén en pé a convocatoria "Mediodía sen Putin": acudir á porta dos colexios electorais ás 12:00 para amosar a súa repulsa ao xefe do Kremlin. O líder opositor, Alexéi Navalni apoiou esta acción antes de morrer, e agora a súa viúva, Yulia.

Votación nas zonas ocupadas

Uns 4,5 millóns de electores poden votar nas zonas ocupadas polo exército ruso nas catro rexións ucraínas anexionadas por Moscova (Donetsk, Lugansk, Jersón e Zaporiyia).

Ucraína tachou de "farsa" as eleccións nesas rexións, que supoñen unha quinta parte do territorio do país. O secretario xeral da ONU, António Guterres, tamén condenou esta, votación.

Tras a morte en prisión de Navalni, os seus correlixionarios (que responsabilizan directamente a Putin do seu falecemento) chamaron a Occidente a non recoñecer os resultados electorais.