Tráfico inicia unha campaña de control da velocidade en Galicia
Tráfico inicia unha campaña de control da velocidade en Galicia
Tráfico recorda que, desde marzo de 2022, os condutores non poden superar o límite de velocidade en 20 quilómetros por hora para adiantar en vías convencionais
A Dirección Xeral de Tráfico (DXT) inicia hoxe, luns 15 de abril, unha campaña de control de velocidade que incide especialmente en estradas convencionais e vías urbanas da comunidade galega.
Esta iniciativa, que se estenderá durante toda a semana, ata o domingo 21, ten como obxectivo conseguir unha maior redución da velocidade media.
A campaña será coordinada polas xefaturas provinciais de Tráfico e utilizará todos os medios posibles, advertindo da existencia de controis a través dos paneis de sinalización variable e nas pantallas alfanuméricas dos vehículos da Agrupación de Tráfico situados nas proximidades.
Ademais, nestes controis a DXT contará co apoio dos diferentes policías locais dos municipios no seu ámbito de actuación.
Os controis garantirán o cumprimento dos límites xenéricos e específicos de velocidade, velocidade en adiantamento e distancias entre vehículos.
Tráfico recorda que, desde marzo de 2022, os condutores non poden superar o límite de velocidade en 20 quilómetros por hora para adiantar en vías convencionais
Neste sentido, cabe lembrar que, en marzo de 2022, entrou en vigor a norma que impide os condutores superar o límite de velocidade en 20 quilómetros por hora para adiantar en vías convencionais.
A campaña busca concienciar os condutores sobre a estreita relación entre velocidade inadecuada e os accidentes de tráfico.
Segundo a DXT, á diferenza da incompatibilidade entre o alcol e a condución ou o uso do cinto de seguridade e o casco, a consideración da velocidade como factor de risco "non adquiriu o mesmo nivel de aceptación entre os condutores" a pesar de que en 2022 o exceso de velocidade "foi a primeira e máis frecuente causa dos accidentes de tráfico mortais en Galicia".
Ademais, reforzaranse os controis nos tramos máis perigosos das vías convencionais onde se produce "o maior número de accidentes e mortes coa velocidade como factor concorrente".
Durante os sete días de campaña de vixilancia e control de velocidade que tivo lugar o ano pasado entre o 17 e o 23 de abril, os axentes do Grupo de Tráfico da Garda Civil controlaron a velocidade de 154.028 vehículos en Galicia.
Do total de vehículos revisados atopáronse 10.866 condutores infractores e, por tanto, denunciados por exceso de velocidade.
