3.000 empregados neoiorquinos serán despedidos por non vacinárense contra a covid

A cidade de Nova York ten previsto despedir este venres uns tres mil empregados municipais que rexeitaron vacinarse contra a covid–19 a pesar das regras impostas polo concello aos seus traballadores, segundo The New York Times.

É a primeira quenda de despedimentos por este motivo que levará a cabo a Gran Mazá, e os afectados serán traballadores públicos que estaban en excedencia e que non presentaron unha proba de vacinación.

Esa cifra representa menos dun un por cento do total de empregados municipais, pois a administración local emprega unhas 370.000 persoas, das cales un 95 por cento recibiron polo menos unha dose, segundo cifras publicadas hoxe por The New York Times.

O consistorio neoiorquino esixiu aos seus traballadores poñer polo menos unha dose da vacina contra o coronavirus para conservar o seu emprego, e pide dúas doses a todos os novos contratados.

Este venres, ademais dos primeiros despedimentos, supoñerá a data límite para que un milleiro de novos traballadores demostren que contan con esas dúas doses.

En total, uns 13.000 empregados municipais solicitaron algún tipo de exención á norma por motivos médicos ou relixiosos.

Varios sindicatos que representan a policías, bombeiros e mestres, entre outros colectivos, demandaron esta semana á cidade para invalidar os despedimentos, aínda que ata o de agora os intentos nese sentido non tiveron éxito nas cortes de Nova York.

O pasado luns, varios centenares de persoas marcharon polas rúas da cidade para protestar por estes requisitos e pedir a fin das restricións contra a covid–19 nunha manifestación convocada con motivo do vencemento do prazo dado aos funcionarios para vacinárense.