Un carteirista trae de cabeza a hostaleiros e clientes da praza ferrolá de Amboaxe

Tomar un café tranquilamente nalgunha das terrazas da praza de Amboaxe en Ferrol é misión imposible. Os hostaleiros e os clientes teñen que estar en alerta continuamente por culpa dun carteirista. Onte mesmo rouboulle a unha muller de oitenta e seis anos que estaba tomando algo nunha destas mesas.

Lucía Bruquetas foi testemuña do roubo. Di que o presunto ladrón aproveitou que a muller estaba pagando para collerlle a carteira da mesa. Contou que varias persoas que estaban na mesa do lado saíron tras el e conseguiron reducilo e recuperar a carteira.

Vicente Boado tamén viu toda a secuencia dende outra terraza. Di que lle impactou ver como a xente saía tras el e conseguía reducilo. Apunta que minutos antes o presunto ladrón pediulles cartos a el e aos seus amigos.

O Piollo que así é como se chama o presunto ladrón, actúa sempre nesta zona. Dedícase a espreitar por estas terrazas e aproveita os descoidos dos clientes para roubalos. Os propietarios das cafetarías que hai pola zona están fartos, e din que cada semana comete entre dous e tres roubos.

Silvia Vilela ten unha cafetaría na praza de Amboaxe. Di que en canto a xente vai pagar aparece e róuballes os cartos, os móbiles, os bolsos ou que encontre. Di que incluso lles roubou o datáfono. Silva di que sempre está pola zona pedindo pero cando non lle dan cartos dedícase a roubar.

O Piollo é un vello coñecido da policía, pero, como os roubos que comete nunca superan os 400 euros, só se castigan cunha multa e queda en liberade ás poucas horas. Os hostaleiros piden máis presenza policial na zona para disuadir este delincuente habitual.