Un incendio calcina unha vivenda unifamiliar en Punxín

Un incendio calcinou por completo unha vivenda unifamiliar situada no quilómetro 16 da N-541 ao seu paso polo concello ourensán de Punxín.

As lapas comezaron pouco despois da medianoite. Os propietarios da casa, un matrimonio de septuaxenarios foron os que avisaron a Emerxencias do que pasaba e saíron ilesos polo seu propio pé.

"Disgústaste, é normal, pero non houbo desgrazas persoais que é o máis importante, porque se chega a ser máis tarde, que estiveramos xa durmindo, igual non había nada que facer xa", asegura Eloi o propietario da casa.

A central de alarmas mobilizou os bombeiros do parque comarcal do Carballiño e a Garda Civil. Tamén se enviou unha ambulancia pero non foi precisa a súa intervención. Os servizos de extinción confirmaron que puideron controlar o incendio contra as 01:45 horas, aínda que traballaron para arrefriar os restos ata pasadas as 03:30 horas.

Os propietarios lamentan que non actuaran máis rápido.

"Tardaron bastante e non traían a escaleira, cando a trouxeron xa pasara unha hora ou máis, e no interior da casa non se aproveita nada", di Eloy.

A vivenda quedou arrasada por completo e a estrutura do tellado tamén quedou afectada.

Os donos da casa explicaron que o lume comezou no teito por riba da cociña na que había unha cheminea. As lapas estendéronse con rapidez.

Sospeitan que o lume se iniciara aquí, no tiro dunha estufa empotrada na cheminea, porque escoitaron un estoupido, pero as causas do incendio aínda están en fase de investigación.