Un veciño de Coirós vai sacrificar un boi de 1.500 quilogramos

Rubio é un boi de 1.500 quilos que está a piques de pasar polo matadoiro e que se criou con moito agarimo, dedicación e, sobre todo, unha alimentación excelente. Conta o seu dono, David López, un veciño de Coirós e propietario dunha explotación agrícola, que "este e non outro foi, sen dúbida, o segredo de que estea tan bonito". 

Rubio ten sete anos, mide case 170 cm e segundo o seu dono "foi castrado antes do ano, alimentado de forma natural, todos os días vai ao pasto, come herba verde, fariña de millo feita na casa, patacas, cabaciñas, tomates e todo o que produce a explotación". Pensan que ten o nivel de engraxamento bo e que a carne está perfecta para degustar. 

A carne de Rubio está moi demandada pero o seu propietario, que recoñece que pola alimentación que lle dou o seu valor é incalculable, vaino vender a unha carnicería de Guísamo. Segundo Jesús Fraga, propietario da carnicería, "sabendo como foi alimentado a carne vai ser bandeira". Di tamén que "sacarán uns 900 quilos para facer chuletóns, hamburguesas e roxóns". 

Estímase que a carne de Rubio estea lista para cando comece o verán.