Unha vertedura no río Castro pon en alerta a piscifactoría de troita de Lires

A piscifactoría Tres Mares de Lires temeu pola súa produción ao confirmar que había unha vertedura no río que a abastece.

Detectouse a primeira hora do mércores, cando varias persoas advertiron que a auga do río Castro baixaba tinguida de branco. O 112 alertou o Seprona, a Policía Local e a Augas de Galicia, que recolleron mostras en varios puntos do curso fluvial. Arestora estanse analizando no Laboratorio de Medio Ambiente de Augas de Galicia, para determinar a composición e a orixe.

Nas próximas horas saberase o alcance dos danos a nivel ambiental e na propia planta, se é que chegou a afectar á poboación de troitas.