Unha célula xihadista planeaba atentar en Barcelona contra un colexio e contra iates de oligarcas rusos

A Audiencia Nacional xulga desde este luns seis presuntos integrantes dunha célula xihadista que tras adestrárense no manexo de armas e explosivos tiña "como prioridade" atentar en Barcelona contra obxectivos rusos, entre os que barallaron tanto turistas coma iates de oligarcas atracados no porto.

O considerado líder desta célula, o alxeriano R. H., alcumado Rabeh, "seguindo a selección de obxectivos realizada polo ISIS e as súas indicacións de perpetrar atentados contra intereses rusos", decidiu que a célula debía atentar nesa dirección, segundo recolle o escrito de conclusións do fiscal.  Pide para el a pena máis alta, 14 anos de cárcere, por un delito de promoción e dirección dun grupo terrorista.

Con este obxectivo, o 28 de setembro de 2017, semanas despois dos atentados das Ramblas, Rabeh e outro dos acusados, O. N., alcumado Brahim, que se enfronta a unha petición do fiscal de 12 anos de cárcere por integración en organización terrorista, seguiron por Barcelona un cidadán ruso.

Dous meses antes, o 10 de xullo de 2018, Brahim manifestara a unhas persoas que o acompañaban polo litoral de Barcelona: “Odio a estes (turistas rusos sentados nunha terraza), se tivese un kalashnikov dispararíalles e mataría máis de 60”. Este propósito de atentar contra intereses rusos, sostén o Ministerio Público, era plenamente compartido por outro dos acusados L. A., alias Soufian, que tamén se enfronta a 12 anos de cárcere, e que lle enviou o 23 de febreiro de 2018 a Brahim un discurso dun xeque non identificado dirixindo unha mensaxe ameazante a Rusia.

Soufian -engade o escrito- foi o encargado, ademais, de contactar con outro dos acusados, H. H., para concretar os obxectivos de interese rusos na Cidade Condal.

A Fiscalía destaca que este último, ao que considera colaborador da célula e pide para el 9 anos de cárcere, traballaba no porto de Barcelona, na empresa Mediterranean Yacht Painters, que presta servizo de reparación e mantemento de iates de grande eslora.

Para "asegurarse a súa adhesión ideolóxica", explica o fiscal, mandáronlle distinto material propagandístico de corte xihadista, como o discurso dun sheik que realizaba unha forte crítica a Rusia pola súa participación no País do Sham (Siria).

Finalmente este acusado indicou os posibles obxectivos a Soufian, "quen fotografou tres iates propiedade de cidadáns rusos que se atopaban ancorados no porto de Barcelona" e deixou as imaxes almacenadas no seu teléfono.

Tratábase dos iates Radiant, construído polo empresario ruso Berezovsky; o Dilbar de Alisher Usmánov e o Hermitage de Anatoly Sedikh, o segundo fabricante de tubos de Rusia.

Imaxe do iate Hermitage do empresario ruso Anatoly Sedikh

Estas tres embarcacións son habituais no porto de Barcelona, onde atracaron en diferentes períodos. O 28 de xullo de 2018, o líder da célula e Brahim mantiveron unha conversación na que se animaban mutuamente a atentar contra cidadáns rusos comentando que estaban a ver vídeos de lobos: "E hoxe un da raza de Putin...".

O líder deste grupo procedeu a marcar os obxectivos tras adestrarse na utilización de explosivos e coitelos ou en como realizar con éxito atropelos masivos e coa expectativa de obter material de guerra.

A designación dos intereses rusos non foi casual senón que estaba en concordancia coas liñas de actuación do Dáesh, que xa en 2016 instara a "soprar o lume dunha guerra santa" contra Moscova. Na elaboración dos plans de atentar en Barcelona contaron coa "axuda esencial", di o fiscal, dun segundo acusado de colaboración, E. E. M. B., "en orde á pretendida obtención de armamento".

O sexto acusado, H. B, alcumado Miami, era o encargado da loxística informática, e é que a célula, a través de Brahim, estaba en contacto con membros de ISIS mediante un complexo sistema consistente no uso encadeado de diversas aplicacións. Grazas a esta conexión directa, podían consultar todo o material cando fose publicado, e nun deses vídeos lánzase unha mensaxe aos lobos solitarios para atentar nos países nos que se atopen. O mesmo estilo dos atentados de Rusia e Al-Andalus (Barcelona), e que finalizaba con imaxes do atentado das Ramblas e fotografías do Rei, o presidente do Goberno e o presidente da Generalitat no acto de homenaxe ás vítimas.