Unha obra da artista ordense Lidia Cao, candidata a Mellor Mural do Mundo en 2022

Lidia Cao, unha moza de Ordes, compite entre un cento de artistas internacionais polo título de mellor mural do ano 2022 que elixe a plataforma Street Art Cities. A obra seleccionada é un mural realizado na localidade valenciana de Ontinyent, titulada Anisoptera, ou o que é o mesmo, cabalo do demo. Un nome que agocha unha fermosa historia.

Quedamos con Lidia ao pé dunha das súas primeiras obras e das máis especiais: A costureira. Realizouna en 2018 para o festival Desordes Creativas, onde descubrira un par de anos antes a súa vocación de muralista.

Desde entón Lidia deixou a súa impronta noutras fachadas, coma esta da Casa do Neno en Santiago. Pero a obra que a acaba de poñer no foco internacional é esta. Titúlase Anisoptera, o nome científico do cabalo do demo. Fíxoa o ano pasado durante o festival MurArt, na localidade valenciana de Ontinyent. Un mural que fala do amor, que ten algo de irreverente e unha chiscadela moi emotiva.

A obra foi seleccionada como mural do mes de xuño pola plataforma Street Art Cities e agora opta ao premio a Mellor Mural do ano entre un cento de artistas internacionais.
Se queren votar por Lidia poden facelo a través da web da plataforma. O 20 de xaneiro publicarán a lista dos 10 finalistas.