Unha patrulleira con base en Ferrol intercepta dous buques da Armada rusa fronte a Galicia

O patrulleiro de altura Centinela (P-72), pertencente á forza de Acción Marítima da Armada, con base no arsenal de Ferrol, dirixiuse rumbo a fronteira norte con Portugal para localizar e realizar seguimento de dous buques de guerra da Armada da Federación Rusa, un submarino clase Kilo II e o remolcador Sergey Balk, que se atopaban en tránsito por augas españolas fronte ás costas galegas rumbo ao seu porto base no Báltico.

O Centinela fíxose á mar durante a tarde do pasado 15 de outubro. "A pesar das duras condicións meteorolóxicas e á falta de visibilidade", explica o Ministerio de Defensa nun comunicado, o Centinela interceptou aos buques rusos na tarde do 17 de outubro preto da fronteira, momento a partir do cal seguiu a súa derrota cara ao límite norte da zona económica exclusiva. Tras iso, o barco español volveu ao seu porto basee en Ferrol.

Para esta operación de vixilancia marítima, o Centinela integrouse no Mando Operativo Marítimo, baixo control operativo do Mando de Operacións (MOPS).

Cunha dotación dunhas 40 persoas, a principal misión do Centinela "comprende a realización de operacións de vixilancia e seguridade marítima nos espazos de soberanía e interese nacional". É habitual o seu apoio a outros organismos do Estado na loita contra a inmigración ilegal, narcotráfico e outras actividades delituosas.

O buque está preparado para efectuar operacións de interdición marítima (visita, rexistro e, no seu caso, apresamento de buques) e prestar auxilio, rescate e asistencia na mar en caso de que se lle requira.