Unha vintena de parellas casan polo rito celta en Cedeira

Entre as parellas reunidas este sábado en Cedeira para casar polo rito celta hai galegos, pero tamén cataláns, vascos, madrileños, casteláns, andaluces e ata unha unha inglesa e un alemán.

"Queremos enraizarnos nestas terras e comprometernos a vivir este ano xuntos o amor", explica o alemán Gerrit Grossjohann.

Algúns buscan completar as súas vodas oficiais ou que estes votos lles vallan de ensaio.

"Este ano casamos polo civil e dixemos 'imos casar tamén por este rito' e aquí estamos", conta Marcial López.

"Temos a voda oficial en outubro. Esta é unha prevoda, unha proba, senón devolvémonos", chancea Marina López.

Outros levan anos vindo e renovando o seu compromiso, porque as vodas celtas caducan.

"Porque os celtas se tiñan algún problema coa parella ao ano seguinte cambiaban. É un contrato temporal", apunta Garmán Vaquero.

 "Os celtas, tanto os homes coma as mulleres, tiñan os mesmos dereitos. Ademais, era a muller a que elixía o home e dicíano de palabra", engade o promotor do encontro.

Os veteranos botan de menos os tempos en que montaban un poboado celta e a celebración alongábase.

"As casetas celtas, cos nenos, co churrasco, coa familia e toda noite troulando e dormiamos alí. Pasabámolo moi ben", recorda Herminia Díaz.

Ademais de revivir os ritos celtas, o encontro é unha desculpa máis para coñecer Cedeira e a comarca de Ortegal.

"A escusa era a voda para logo coñecer a zona", admite Gotzon López.