Xa comezou a campaña de renda 2023-2024, por María Loureiro

A campaña da renda 2023 en España arrincou este 3 de abril de 2024, con oito días de antelación respecto ao ano pasado, e convértese na máis longa dos últimos anos. A data límite para presentar o borrador está fixada para o 1 de xullo, aínda que o 26 de xuño será o último día para presentar a declaración en liña no caso de que o resultado sexa ingresar con domiciliación en conta.

Existen importantes novidades este ano, e, a título de resumo, cabe destacar as seguintes:

Mínimo exento de presentar a declaración: un dos cambios máis relevantes é a retribución por rendementos de traballo a partir da cal será obrigatorio presentar a declaración da renda. Este ano terán que render contas todos aqueles empregados que cobren un soldo bruto superior aos 15.000 euros con dous ou máis pagadores. Anteriormente, este mínimo estaba fixado nos 14.000 euros.

Declaración obrigatoria para os autónomos: os traballadores por conta propia son outros dos principais afectados polos cambios na campaña da renda. Como novidade, todos os autónomos estarán obrigados a render contas con Facenda, independentemente de cal sexa a contía dos seus ingresos. Ata o de agora, só estaban obrigados a facelo aqueles que ingresaban máis de 1.000 euros.

Rebaixa ás rendas baixas e subida ás grandes rendas: os contribuíntes que ingresan menos de 20.000 euros beneficiaranse dunha redución por obtención de rendementos do traballo, mentres que quen pagará máis son as rendas do capital, especialmente as que superen os 200.000 euros

Dedución por maternidade: ata o ano 2022 só as nais traballadoras se podían beneficiar da dedución de 1.200 euros anuais por cada fillo menor de tres anos. Agora, mesmo se no momento do nacemento non estaba a nai traballando senón cobrando o desemprego, ou tamén se con posterioridade cotizou polo menos 30 días, poderá igualmente beneficiarse desta dedución e solicitar o pagamento anticipado de 100 euros ao mes.

Dedución pola adquisición de vehículos eléctricos: a Axencia Tributaria estableceu unha nova dedución temporal no IRPF para aqueles contribuíntes que adquiran un vehículo eléctrico desde o 30 de xuño de 2023 ata o 31 de decembro de 2024. A dedución poderá ser do 15 % do valor de adquisición se se entregou a conta polo menos o 25 % do seu valor. Como condición, Facenda establece que estes vehículos se adquiran a título persoal.

Achegas a plans de pensións: mantense en 1.500 euros a achega máxima aos plans de pensións individuais con dereito a dedución, aínda que coa posibilidade de incrementar as achegas ata en 8.500 euros máis por achegas a plans de pensións empresariais.

Presentación en liña da declaración do IRPF: recentemente, o Goberno fixou a obrigación de presentar a declaración do Imposto da Renda sobre as Persoas Físicas (IRPF) a través de medios electrónicos, "sempre que a Administración tributaria asegure a atención personalizada aos contribuíntes que precisen de asistencia para a súa cubrición por tales medios". Esta última precisión de Facenda prodúcese despois dunha sentenza do Tribunal Supremo deste mesmo ano que puxo de manifesto unha "insuficiencia normativa" para o establecemento dos medios electrónicos como única canle para a presentación da declaración do IRPF.

Dadas estas diferenzas e outras que non podemos cubrir por falta de tempo, recoméndase solicitar o borrador a través da páxina web Rentaweb canto antes e así evitar os típicos apuros de última hora. Lembremos que podemos presentala en liña ata o 26 de Xuño, en caso de devolución.

A campaña da renda en España ten unha longa historia que se remonta a finais do século XIX. Tal como se recoñece na páxina web da Axencia Tributaria, o Ministerio de Facenda foi creado no século XVIII pola administración borbónica, nun intento de solución á grave crise en que entrara o sistema financeiro da Coroa durante o reinado da Casa de Austria.

Aínda que desde sempre existiron múltiples tributos de pago obrigatorio pola cidadanía, foi en 1870 cando se estableceu por primeira vez o Imposto sobre a Renda das Persoas Físicas (IRPF) en España. Durante o século XX houbo bastantes cambios na recolección do devandito imposto e non foi ata 1978, cando se aproba a Constitución Española, que se estableceu a igualdade de todos os cidadáns ante o fisco.

Os ingresos do Imposto sobre a Renda das Persoas Físicas (IRPF) supoñen unha parte importante do financiamento do Estado español. En 2023, estímase que o IRPF achegará máis do 35 % dos ingresos totais do Estado. Outros impostos importantes son o Imposto sobre o Valor Engadido (IVE), que representa o 25 %; o Imposto de Sociedades, que, acumula o 10 % da recadación, e outros outros impostos o 30 % (tales como o imposto de sucesións e doazóns, o IBI e o imposto de circulación, entre outros). Como podes ver, o IRPF é o principal imposto que financia o Estado español. Isto débese a que é un imposto progresivo, o que significa que as persoas que máis gañan pagan unha porcentaxe maior dos seus ingresos en impostos. Os ingresos do IRPF utilízanse para financiar servizos públicos como a educación, a sanidade e a seguridade social. Estes servizos son esenciais para o benestar da cidadanía, polo que nun período como o actual quizais cabe lembrar unha antigo lema que convocaba ao pago de impostos, o famoso “Facenda somos todos”.