Zapatero confirma que mediou para que Edmundo González puidese abandonar Venezuela

O expresidente do Goberno José Luis Rodríguez Zapatero confirmou que participou "na tarefa de facilitación" para que o líder opositor venezolano Edmundo González puidese vir a España e mostrouse seguro de que "antes ou despois" haberá intentos para chegar a unha solución política.

Zapatero fixo estas declaracións á súa chegada ao Ateneo, onde se presentou o libro A democracia e os seus dereitos, do que foi coordinador.

O expresidente socialista afirmou que coñece todo o que sucedeu en Venezuela nos últimos meses pero evitou pronunciarse para non romper a "confianza" que labrou nos últimos anos e que, afirma, pode servir para buscar unha solución á situación do país suramericano.

Foron as súas primeiras declaracións en varios meses, despois das eleccións presidenciais en Venezuela deste verán ás que asistiu in situ e que segundo a oposición deron como vencedor o candidato opositor Edmundo González Urrutia, agora refuxiado en España.

Así, eludiu pronunciarse sobre o resultado electoral e sobre se o Goberno español debe recoñecer a González Urrutia como presidente, tal como fixo o Congreso dos Deputados. Ademais, di que se sente na potestade de falar despois de que o fixo o dirixente opositor.

"Debo dicir que cando alguén facilita, cando alguén media, debe ser extraordinariamente respectuoso. É un dereito e un deber de manter discreción e lealdade ás persoas que permitiron que facilites nalgunha tarefa", indicou.