A Zona Franca vaise autoabastecer de hidróxeno verde na terminal viguesa de Bouzas

O Consorcio da Zona Franca de Vigo adxudicou á UTE formada por H2B2 e ImesAP o despregamento dunha planta de hidróxeno verde, a primeira na cidade, cuxa construción comezará no segundo semestre deste ano e entrará en servizo no segundo semestre do que vén.

H2B2 é unha compañía tecnolóxica global no sector enerxético do hidróxeno, e ImesAPI é unha empresa dedicada á estruturación, desenvolvemento e xestión de infraestruturas e servizos.

O seu proxecto para despregar unha planta de tecnoloxía híbrida fotovoltaica-hidróxeno verde nas instalacións da área Portuaria de Bouzas convenceu a Zona Franca, segundo informou nun comunicado.

A planta servirá para avanzar no autoabastecemento enerxético e a descarbonización da actividade do Consorcio, que espera reducir as súas emisións de CO2 en 1.215 toneladas anuais.

A planta estará na área Portuaria de Bouzas e contará cun sistema integrado por unha instalación fotovoltaica e unha planta de produción, almacenamento e dispensado de hidróxeno destinado á mobilidade.

H2B2 proporcionará a tecnoloxía relativa ao hidróxeno e ImesAPI estará a cargo do sistema fotovoltaico e a interconexión de ambos os sistemas.

A instalación solar fotovoltaica estará situada nas cubertas das naves industriais do Consorcio, ocupando unha superficie de 15.127 metros cadrados, e producirá cada ano 3,8 GWh, dos que arredor de 1,5 GW vanse destinar ao autoconsumo colectivo.

Os excedentes destinaranse á produción de hidróxeno, que tamén se poderá alimentar da rede eléctrica co obxectivo de garantir unha produción de hidróxeno verde constante ao longo do ano.

Para iso, un electrolizador O200N de 1 MW de potencia producirá ata 430 quilogramos de hidróxeno ao día.

Así, o proxecto proporcionará unha fonte de enerxía verde e renovable e contribuirá ao mantemento dunha frota de vehículos de hidróxeno.

O proxecto conta cun orzamento de algo máis de sete millóns de euros, dos que uns tres millóns investiranse na produción de hidróxeno e construción da estación de servizo, outros tres destinaranse á instalación fotovoltaica e o resto á obra civil, xestión de residuos, seguridade e saúde, control de calidade, xestión do proxecto e tramitacións, gastos xerais e mantemento das instalacións durante 5 anos.

Espérase que o proxecto entre en funcionamento a finais do ano 2024.