Un camión cargado de lodos envorca e bate contra un turismo en Cospeito
Un camión cargado de lodos envorca e bate contra un turismo en Cospeito
O camioneiro tivo que ser liberado polos bombeiros e trasladado ao HULA
O vehículo transportaba decenas de toneladas de residuos orgánicos dun matadoiro
O accidente provocou unha vertedura no río Miño, cuxo alcance investiga o Seprona
No concello chairego de Cospeito rexistrouse unha colisión entre un camión e un turismo. Como consecuencia, quedaron cortados ambos sentidos da circulación na estrada LU-113, á altura da parroquia de Xustás.
Por causas que se descoñecen, o camión envorcou, invadiu o carril contrario e acabou batendo contra un coche. O vehículo pesado ía cargado de lodos, que acabaron ciscados pola calzada e vertidos ao río Miño.
O Seprona investiga agora o alcance da vertedura. Trátase de decenas de toneladas de restos orgánicos procedentes do matadoiro de polos de Castro de Ribeiras de Lea.
Pola súa parte, o camioneiro resultou ferido no accidente e tivo que ser liberado polos bombeiros de Vilalba, mentres que a condutora do turismo, en principio, saíu ilesa. Aínda que os danos persoais non foron graves, a vítima do sinistro foi trasladada a Urxencias do HULA.
Juan Carlos Riveira, compañeiro da vítima do accidente: "Quedou atrapado e viñeron liberalo. Os bombeiros tiveron que cortar o cristal da cabina para sacalo. Tiña unha lesión no ombro e non podía saír polo seu propio pé".
Mentres non foi retirado o camión, durante o horas o tráfico da estrada que une Castro de Ribeiras de Lea con Abadín tivo que ser desviado por pistas secundarias.
