O acordo PSOE-PNV abre a porta a "falar do recoñecemento nacional de Euskadi"

O presidente do PNV, Andoni Ortuzar, afirmou este venres, no Congreso dos Deputados, que o acordo alcanzado co PSOE garante a negociación e o traspaso ao País Vasco de todas as competencias pendentes e senta as bases para negociar o autogoberno futuro, nun horizonte temporal máximo de dous anos.

Nunha intervención ante os medios tras asinar o acordo de investidura co presidente en funcións, Pedro Sánchez, Ortuzar explicou que o acordo supón un "nítido avance" no cumprimento do autogoberno presente, no Estatuto de Gernika e en canto ao futuro ambas as partes aceptan negociar sobre o "recoñecemento nacional" de Euskadi, salvagárdaa das competencias vascas e un sistema de garantías baseado na bilateralidade e na foralidade.

Ortuzar explicou que se crea unha comisión para que cada seis meses se faga un seguimento dos cumprimentos destes acordos. "Non é que non me fíe do presidente, pero por se esa palabra non se cumprise..", dixo.

"Os acordos que se alcancen entre ambos os partidos deberán responder as demandas maioritarias do Parlamento vasco", precisou o presidente do PNV, que explicitou que a comisión mixta do concerto vasco terá as bases para fixar as de reposición nas ofertas públicas de emprego, así como os máximos globais da masa retributiva dos empregados públicos.

Ortuzar fixo fincapé en que "isto que é para a comunidade autónoma vasca, tamén será para Navarra". En materia de fiscalidade, amplíase o concerto económico e acórdase a concertación de novos impostos e os límites de débeda, fixados na comisión mixta do concerto. En seguridade, refórzanse as competencias da policía vasca (Ertzaintza) e a súa presenza e participación en ámbitos internacionais de seguridade.

Grazas a este acordo, Ortuzar anunciou que Navarra recibirá no prazo de seis meses as competencias de I+D+i e a de bolsas. E a resolución de problemas que afectan a moitos vascos, como os xerados coas últimas modificacións lexislativas en canto ao sistema de previsión social propio das cooperativas.

Como "broche simbólico", Ortuzar valorou que se alcanzou un acordo que reportará ás institucións vascas 100 millóns de euros en catro anos para acometer o reto do éuscaro a novo universo dixital.

Trátase dun acordo moi amplo polo que o PNV garante o apoio á investidura de Sánchez e á estabilidade da lexislatura "sempre suxeito aos avances e ao cumprimento leal dos compromisos alcanzados".

O acordo xa provocou as críticas da Asociación do Corpo de Letrados da Seguridade Social. Din que se trata dun ataque ao Estado de Dereito e ao principio de Igualdade.

Tamén do PP que di que se racha coa caixa única."E unha liña vermella máis que cruzou Pedro Sánchez", asegura Cuca Gamarra, Secretaria xeral do PP.

Con todo, a vicesecretaria xeral do PSOE e ministra de Facenda en funcións, María Jesús Montero, negou que o acordo asinado co PN recolla o traspaso da Seguridade Social, xa que afirma que esta cuestión non está "singularizada" no texto.

O PSOE suma tamén o voto favorable da única deputada de Coalición Canaria. Serán 179 votos favorables, 3 máis da maioría absoluta.

Do acordo entre o PNV e o PSOE falou o presidente da Xunta. Alfonso Rueda cre que  o pacto rompe a igualdade entre os españois ao incluír o traspaso da Seguridade Social. O presidente galego pide a celebración dunha conferencia de presidentes para que Sánchez o aclare.