Os motores económicos de España empezan a perder forza, por Venancio Salcines

Un 0,3 % é o que medrou o PIB de España fronte ao anterior trimestre. A cantidade é a máis baixa do último ano e medio e loxicamente acende as alarmas. Vai España cara a unha recesión? Imos entrar nunha senda de crecemento nulo ou moi baixo? Que é o que pode pasar?

Neste intre o país só ten un sostén sólido, o consumo dos fogares. Cara ao anterior trimestre, o investimento privado cae, as exportacións caen e as importacións, que soben sempre que medramos, tamén caen. Polo tanto, o barco segue en pé porque as administracións públicas e as familias seguen vivas.

Os investimentos privados están vinculados a catro variables: os xuros, as exportacións e o consumo das familias e das empresas. Soamente un segue en activo. As exportacións están claramente conectadas co clima económico en Alemaña e Francia, que determina á súa vez o de toda a Unión Europea. En Berlín xa están en recesión aínda que en París, menos vinculada ao petróleo ruso, está a evitarse, pero, en todo caso, non compensa a falta de pulo da economía de Alemaña.  

As administracións públicas teñen dúas bombonas de osíxeno, os fondos Next Generation e o efecto positivo da inflación nos ingresos tributarios. Polo tanto, poderán seguir acercándose aos obxectivos marcados por Europa sen grandes tensións financeiras.

E o consumo familiar? Ten un vento de fronte que é a inflación pero ten outro ás súas costas, que é o incremento do número de empregados, e cando o mercado laboral se tensa ocorre un efecto poucas veces comentado: os cambios funcionais dentro da propia empresa. As compañías soen ampliar o cadro de persoal engordando a base, facilitando a carreira profesional dos veteranos, é dicir, incrementan os ascensos e, polo tanto, as melloras salariais correspondentes. 

E este dato, o emprego, foi especialmente positivo en Galicia neste trimestre, que foi capaz de superar os seus veciños, como Castela e León ou Asturias, ou as comunidades cun especial dinamismo económico, como Madrid, Aragón ou o País Vasco. En todo caso, España no seu conxunto tivo uns datos de emprego excepcionais, segundo a última EPA xa superamos os 21,265 millón de ocupados.

Polo tanto, que temos por diante? É evidente que un arrefriamento. E non se pode dicir máis, estamos ás expensas da recuperación económica de Europa Central, do comportamento dos prezos e do crecemento da economía mundial. O único certo é que temos un pouco máis de osíxeno que os nosos veciños, e iso dános algo más de tempo. Esperemos que sexa suficiente.