A 44Cup chega a Galicia por primeira vez

A 44Cup, un dos circuítos internacionais de regatas máis importantes do mundo, terá o próximo mes de maio unha parada en Galicia, segundo informou este martes o Monte Real Club de Iates de Baiona (MRCYB), que será o anfitrión da devandita proba.

Tras acoller as Super Series en 2022 e o Mundial da clase J80 en 2023, o club presidido por José Luis Álvarez aposta agora polos RC44, outra competición con todos os equipos navegando en barcos idénticos.

O veleiro, creado polo considerado mellor patrón da historia da Copa América, o neozelandés Russell Coutts, é un barco construído en fibra de carbono, moi lixeiro, de 13,45 metros (44 pés), unha ampla superficie vélica e os sistemas de navegación máis avanzados. Entre os participantes destacan, entre outros, nomes como o británico Iain Percy, dúas veces medalla de ouro olímpico e director do equipo da Copa América de Artemis Racing; Cameron Appleton, gañador da Copa América 2000 e gañador do RC44 Championship Tour 2011, 2012, 2013 e 2014; Vasco Vascotto, lenda da vela italiana con dous títulos MedCup, 20 mundiais e 11 europeos no seu palmarés; ou Paul Cayard, sete veces campión do mundo de vela e dúas veces olímpico.