Alcaraz cítase con Djokovic na gran final de Wimbledon

Carlos Alcaraz avanza imparable cara á cita máis importante da súa vida. O murciano xogará a final de Wimbledon tras derrotar a Medvedev cunha actuación soberbia. Triplo 6-3 en hora e cincuenta minutos de xogo. Alcaraz está a un partido de superar todas as expectativas, e eran moitas, que había depositadas nel.

"Estou xogando a un nivel brutal, con moita confianza, movéndome moi ben. Creo que me definiría como brillante", explicou o actual número un do mundo ao remate do encontro.

Esa brillantez da que fala levarao a medirse con Djokovic na gran final londiniense, a primeira para o español, que desafiará, apenas 40 días despois do cruzamento de París, a experiencia de Novak. Tras eliminar a Jannik Sinner, Djokovic alcanza as 35 finais aos seus 36 anos. A resistencia do balcánico semella non ter límite. 

"É certo que teño máis experiencia que Alcaraz xogando Grand Slam ou finais en Wimbledon, pero el está nun estado de forma excepcional, está moi motivado, é novo e ademais ten moita fame. Pero eu tamén estou famento. Así que, gocemos do banquete", dixo o serbio. 

E mentres en Londres se preparan para o festín, o público aplaude a final máis agardada. Hai en xogo un título e o número un que Alcaraz defende dende o 26 de xuño. "Xogar unha final en Wimbledon é algo co que levo soñando desde que empecei a xogar. É incluso mellor facelo contra Djokovic", asegurou o tenista murciano antes de engadir: "Probablemente para Novak sexa un día máis, un momento máis. Pero para min será o momento máis importante da miña vida" .

Djokovic, que xogará este domingo a súa novena final en Wimbledon, cre: "Vai ser un gran reto, probablemente un dos máis grandes que poida ter neste momento en todos os sentidos".

En Londres mídense dúas xeracións. O duelo ditaminará se hai cambio de ciclo no tenis masculino mundial.