Baixa o movemento transfronteirizo con Portugal ante as novas restricións pola covid
Longas ringleiras nas gasolineiras galegas da raia ante o medo ao peche da fronteira
En Portugal, hoxe entra en vigor o estado de calamidade. E malia que finalmente só se piden probas negativas na fronteira se se procede de países en risco alto, que non é o caso de España, si se notou unha menor afluencia de galegos cruzando o Miño.
O mal tempo, as novas restricións e sobre todo as dúbidas que houbo ata onte sobre os controis na fronteira fixeron que hoxe foran menos os que se animasen a facer aquí as compras.
Os comerciantes e os hostaleiros teñen medo de que esta sexa a tendencia na ponte festiva. Por iso insisten en que finalmente só se está a pedir o pasaporte de vacinación covid e non probas PCR aos visitantes, turistas ou traballadores que crucen a fronteira terrestre lusa.
Precisamente o medo a un peche de fronteiras fixo que centos de condutores portugueses colapsaran nas últimas horas as gasolineiras galegas fronteirizas.
