Detido un afeccionado de Unionistas por agredir a Bernardo Cruz, xogador do Lugo
Detido un afeccionado de Unionistas por agredir a Bernardo Cruz, xogador do Lugo
Os feitos aconteceron no descanso do partido que xogaron este mediodía no estadio Raíña Sofía
Un seareiro do Unionistas de Salamanca foi detido por pegarlle unha labazada na faciana ao xogador do Lugo Bernardo Cruz cando os equipos se retiraban no tempo de descanso. A través dun comunicado de prensa, a entidade salmantina condenou o "lamentable" incidente acontecido ao remate do primeiro tempo e indicou que o agresor, logo de ser identificado pola xente de seguridade do club, foi detido pola Policía Nacional.
"Este feito é contrario aos valores do club e á nosa forma de vivir e gozar deste deporte. O Unionistas está á disposición das forzas e corpos de seguridade do estadio para calquera colaboración que precisen ou estimen oportuna", destaca o club de Salamanca.
O Lugo agradeceulle ao club salmantino e á Policía Nacional a súa rápida actuación á hora de identificar e expulsar o agresor de Bernardo Cruz. O xogador tamén se pronunciou a través das súas redes sociais.
