Ence alíase con ShareTex para facer unha planta de reciclaxe téxtil nas Pontes

Ence anunciou este martes a firma dun memorando de entendemento coa firma sueca ShareTex co obxectivo de construír unha planta piloto de reciclaxe téxtil nas Pontes.

Nun comunicado, a empresa resaltou que a "instalación non empregará madeira, senón fibras recuperadas", e que se "autoabastecerá de enerxía renovable", cun "consumo mínimo de auga".

Ademais, asegurou que o complexo "se situará nun chan industrial que ocupa a central térmica" de Endesa, polo que indicou que non "afectará espazos nin hábitats naturais".

Sobre o plan de recuperación de fibras téxtiles, Ence puntualizou que se recorrerá a unha "nova tecnoloxía xa probada a escala de laboratorio que ofrece claras vantaxes respecto a outras de reciclaxe química actualmente en desenvolvemento".

O obxectivo, afirmou, é "solucionar o problema de xestión deste tipo de residuos de forma sostible", premisa ante a que subliñou como "principais vantaxes a capacidade de procesado dos téxtiles de polialgodón, ampliando así a gama de téxtiles susceptibles de ser reciclados".

"Esta nova tecnoloxía non precisa de condicións drásticas de presión nin de temperatura nin tampouco emprega disolventes tóxicos", apostilou, para incidir en que se utilizarán "residuos posconsumo recollidos na rexión".