España, Irlanda, Malta e Eslovenia están dispostos a recoñecer o Estado palestino

España, Irlanda, Malta e Eslovenia amosaron este venres a súa predisposición para recoñecer o Estado palestino en canto "poida facer unha contribución positiva e as circunstancias sexan as correctas", dixeron nun comunicado.

Os primeiros ministros destes catro países mantiveron un encontro nas marxes do cume de xefes de Estado e de Goberno da Unión Europea deste venres en Bruxelas, no que debateron a súa "disposición para recoñecer Palestina".

"Xuntos falamos da nosa disposición para recoñecer Palestina e dixemos que o fariamos cando poida facer unha contribución positiva e as circunstancias sexan as correctas", apunta o comunicado dos catro países europeos.

Son nove os países da UE que xa recoñecen ao Estado palestino, entre os que se atopan Bulgaria, Chipre, Eslovaquia, Hungría, Malta, Polonia, República Checa e Romanía, todos eles desde 1988, a gran maioría pola súa antiga pertenza á Unión Soviética. Ademais destes, Suecia recoñeceu a Palestina en 2014 e outros trece teñen unha oficina diplomática en Xerusalén Este ou en Ramala, entre eles España.

O presidente do Goberno español, Pedro Sánchez, adiantou a súa intención de expoñer na presente lexislatura ao Congreso español o recoñecemento por parte de España do Estado palestino.

Na primeira xornada de cume europeo deste pasado xoves, os líderes lograron por primeira vez un acordo para pedir unha "pausa humanitaria inmediata" na guerra en Gaza "que conduza a un cesamento do fogo sostible, á liberación incondicional de todos os reféns e a provisión de asistencia humanitaria".

Xunto aos seus homólogos irlandés, esloveno e maltés, Sánchez acolleu positivamente esta conclusión a vinte e sete e insistiu na "necesidade urxente" dese cesamento do fogo inmediato, a liberación sen condicións dos reféns e un aumento "rápido, grande e sostido" da axuda humanitaria que chega á Franxa de Gaza.

"Estamos de acordo en que a única forma de alcanzar unha paz duradeira e estabilidade na rexión é a través da implementación dunha solución de dous Estados, cos Estados israelí e palestino vivindo un á beira do outro en paz e seguridade", recalcan estes catro países no comunicado.

O conflito ucraíno

O presidente español tamén aproveitou para falar sobre a situación na Ucraína, quen asegura que Putin "non foi quen de gañar a guerra, pero tampouco a perdeu". A situación na que se atopa o conflito ucraíno require de apoio urxente para que non se produza un retroceso na guerra.