Hugo Sotelo: "Xogar de inicio fíxome máis ilusión que cando debutei"

O centrocampista do Celta, Hugo Sotelo, titular na primeira xornada de Liga ante o Osasuna, augurou este mércores un partido "moi difícil" ante a Real Sociedade, ao que visitan este sábado en Anoeta: 

"É un equipo que xoga moi ben, con moitos xogadores de toque que nos poñerán as cousas difíciles. Será un rival moi complicado", avisou o canteirán.

Sotelo vaise reencontrar en San Sebastián co seu excompañeiro Brais Méndez:

"Voulle escribir estes días, faríame ilusión ter a súa camiseta".

Sotelo restoulle importancia a arrincar o curso ligueiro cunha derrota porque confía "plenamente neste equipo", e dixo que aínda están "a se adaptar" ao sistema de xogo que quere implantar Rafa Benítez: 

"É un proceso longo, temos que ir aos poucos", indicou o centrocampista, quen non escondeu a súa satisfacción por formar parte do primeiro once da tempada. 

"O máis inesquecible para un xogador é debutar en primeira e, por sorte, fíxeno hai dúas tempadas. Xogar de inicio é algo máis significante, fíxome máis ilusión", manifestou.