Investigadas dúas persoas por roubar oito portas e unha ducia de xanelas en Vedra

A Garda Civil de Milladoiro investiga dous homes, veciños da Coruña de 21 e 22 anos, como presuntos autores dun delito de furto, tras a subtracción de varias portas e xanelas instaladas nun local de titularidade municipal e uso público, situado na parroquia de San Xulián de Sales, no municipio coruñés de Vedra.

Os feitos remóntanse ao pasado 26 de xaneiro cando, a plena luz do día, foron subtraídas varias portas de dobre folla e xanelas de aluminio lacado, valoradas en 12.000 euros.

A denuncia foi interposta dous días despois, o 28 de xaneiro, no Posto da Garda Civil de Lestedo, o que deu inicio a unha investigación conxunta entre ambas as unidades.

Os axentes identificaron o vehículo utilizado para o transporte dos obxectos subtraídos e os dos presuntos autores do roubo, que prestaron declaración na comandancia do Milladoiro en calidade de investigados.

As dilixencias instruídas foron remitidas ao Xulgado de Instrución de Garda de Santiago de Compostela.