O chavismo e a oposición volven medir as súas forzas nas rúas de Venezuela

Un mes despois das eleccións en Venezuela, a principal alianza opositora e o chavismo volven medir as súas forzas nas rúas.  A oposición protesta contra a decisión do Tribunal Superior de Xustiza que ratificou a vitoria do oficialismo. Esixen unha vez máis a publicación das actas que, aseguran, demostran que gañaron os comicios.

Maduro convocou tamén aos seus seguidores para conmemorar a vitoria un día despois de reforzar o goberno ascendendo e ampliando as competencias dos seus ministros máis leais en materias estratéxicas como seguridade ou economía.

"Delsy Rodríguez asume o ministerio de Petróleo. E Diosdado Cabello é o novo ministro do Poder Popular, de Interior, Xustiza e Paz e da vicepresidencia do Goberno", anunciaba Maduro horas antes das protestas.

 Para a oposición o chavismo perdeu o contacto coa realidade e só lle queda o control xudicial e policial para intentar frear unha oposición cada vez máis forte.

"E agora din que o réxime non vai ceder. Saben que: ímolo facer ceder", aseguraba a líder opositora, Corina Machado durante a marcha de Caracas.

A oposición volve denunciar o acoso xudicial aos seus representantes e o aumento da represión política, mesmo a detención de nenos. Á denuncia deste aumento da represión desde as eleccións sumouse  nas últimas horas a Comisión Interamericana de Dereitos Humanos.

Machado urxiu a este órgano a "manter o seguimento" sobre a situación no país caribeño, onde a exdeputada denuncia que hai "prácticas de terrorismo de Estado" tras as eleccións presidenciais do 28 de xullo.

"Ante as violacións sistemáticas aos dereitos humanos e os crimes de lesa humanidade, non pode haber neutralidade, indiferenza ou inacción", expresou en X Machado, quen agradeceu o informe presentado pola Comisión Interamericana de Dereitos Humanos (CIDH) ante un Consello Permanente da OEA, no que alerta dun aumento de "a represión" na nación suramericana.

A opositora sinalou que, como "describiu a CIDH, máis de 100 adolescentes foron detidos arbitrariamente" e "máis de 200 mulleres están encarceradas ilegalmente", e denunciou que "casas foron marcadas, centos de pasaportes foron anulados, máis de 1.400 persoas foron secuestradas e 24 asasinadas".

Desde Venezuela, agradezco el informe presentado hoy por la CIDH (@CIDH) ante el Consejo Permanente de la OEA, a través de su Presidenta Roberta Clarke, en el cual describe las prácticas de terrorismo de Estado que enfrentamos los venezolanos después del 28 de julio.

Ante las… https://t.co/7I8tennb3r

— María Corina Machado (@MariaCorinaYA) August 29, 2024

Na súa mensaxe, Machado reiterou que o abanderado da principal coalición opositora -a Plataforma Unitaria Democrática (PUD)-, Edmundo González Urrutia, foi o gañador dos comicios de hai un mes, a pesar de que o Consello Nacional Electoral (CNE) proclamou gañador ao presidente Nicolás Maduro para un terceiro sexenio consecutivo no poder.

"Nós gañamos as eleccións, a fraude quedou evidenciada e estamos preparados para unha transición democrática que traia o benestar e a paz para todos os venezolanos, que beneficie á rexión e garanta o acceso á xustiza para todos", agregou a exdiputada, principal valedora de González Urrutia.

Na presentación do informe, que non foi elaborado sobre o terreo, a presidenta da CIDH, Roberta Clarke, alertou tamén dun "uso arbitrario da forza", así como detencións que inclúen a menores de idade.

Segundo cifras oficiais, máis de 2.400 persoas foron detidas desde o 29 de xullo -algunhas en manifestacións e outras en operativos policiais- e 25 foron asasinadas en feitos de violencia que o Goberno atribúe á oposición, mentres que o antichavismo culpa ás forzas de seguridade do Estado, por orde de superiores. 

Incluso os dirixentes tradicionais do Partido Comunista de Venezuela dixeron este mércores que Maduro deu "un paso sen retorno cara o autoritarismo".