Trump cancela os permisos de petroleiras, entre elas Repsol, que exportan cru venezolano

O presidente dos EUA, Donald Trump, notificou aos socios da petroleira estatal venezolana PDVSA, entre eles a española Repsol, que os seus permisos para exportar cru e derivados de Venezuela quedaban cancelados, informaron nas últimas horas medios estadounidenses.

Ademais de Repsol, entre as compañías afectadas están a estadounidense Global Oil Terminals, a italiana Eni, a francesa Maurel & Prom e a india Reliance Industries, que recibiran permisos para operar con cru venezolano nas súas refinerías de todo o mundo, de maneira excepcional ás sancións contra o chavismo.

Esas licenzas foron outorgadas durante a Administración do demócrata Joe Biden (2021-2025), polo que, segundo a prensa dos EUA, a maioría destas petroleiras xa suspenderan as importacións de petróleo de Venezuela despois de que esta semana Trump ordenara un arancel do 25 % a compradores de cru e gas venezolano.

Nos casos de Repsol e Reliance, con gran presenza nos Estados Unidos, solicitouse autorización para operar en Venezuela e evitar incorrer en sancións.

Agora, as empresas teñen ata finais de maio para liquidar as operacións en Venezuela, o que intensifica a campaña da Administración Trump para illar este país, no medio dunha batalla na que tamén xoga un papel fundamental a migración: Washington dixo que Caracas se opuxo puntualmente a aceptar a connacionais deportados de EUA.

Desde o Goberno venezolano negan esa afirmación e, segundo informaron, un voo con 229 venezolanos procedentes de EUA aterrará hoxe en chan venezolano.

Trump tamén anunciou semanas atrás a revogación dunha licenza clave concedida á estadounidense Chevron para operar en Venezuela, que terá que desmantelar as súas instalacións no país latinoamericano.

Así mesmo, o mandatario estadounidense emitiu unha orde executiva esta semana que establece que os Estados Unidos comezarán a impoñer o mencionado arancel do 25 % a calquera país que compre petróleo venezolano.
 

Trump di que "se enfadou moito" con Putin e ameaza con novos aranceis a Rusia

O presidente estadounidense Donald Trump dixo este domingo nunha entrevista coa cadea NBC que "se enfadou moito" cando o seu homólogo ruso, Vladímir Putin, criticou a credibilidade do mandatario ucraíno, Volodímir Zelenski, e ameazou a Moscova con novos aranceis se non facilita acordo para a fin da guerra.

"Se Rusia e eu non logramos chegar a un acordo para deter o baño de sangue en Ucraína, e se creo que foi culpa de Rusia, que podería non selo, vou impoñer aranceis secundarios ao petróleo, a todo o petróleo que saia de Rusia", declarou Trump nunha chamada telefónica con NBC a madrugada do domingo.

Trump aclarou en que isto significaría que "se compras petróleo de Rusia, non podes facer negocios nos Estados Unidos" e que o arancel podería chegar ao 50 %.

Ademais, detallou que os gravames entrarían en vigor nun mes se non hai acordo de cesamento do fogo, que Putin sabe que está enfadado, pero que ten "unha moi boa relación con el" e que "o enfado se disipará rapidamente... se fai o correcto".

De feito, Trump afirmou que ambos planean volver falar esta semana.