Von der Leyen avisa de que a UE ten un plan sólido contra os aranceis dos EUA

A presidenta da Comisión Europea Ursula von der Leyen avisou este martes de que a Unión Europea ten forza para "contraatacar" e conta cun plan sólido para facer fronte aos aranceis adoptados polo presidente dos Estados Unidos Donald Trump, que afectan a numerosos sectores.

Nunha intervención no Parlamento Europeo en Estrasburgo, a líder comunitaria insistiu en que o enfrontamento comercial non beneficia a ninguén, e, aínda que o Executivo europeo está disposto a traballar en prol dunha solución construtiva para unha balanza comercial tanto de bens como de servizos cos Estados Unidos, afirmou que ten capacidade de responder con firmeza ao pulso de Washington.

"Ten que quedar claro: Europa non iniciou este enfrontamento. Non queremos necesariamente tomar represalias, pero temos un plan sólido para facelo se é necesario", sostivo, tras recalcar que o bloque europeo ten todo o necesario para protexer os cidadáns e a prosperidade europea.

Von der Leyen detallou que o prioritario é a unidade e a determinación dos europeos, polo que defendeu os seus contactos cos líderes da UE sobre os próximos pasos que cómpre dar. "Avaliaremos coidadosamente os anuncios de mañá para calibrar a nosa resposta", dixo.

En todo caso, reiterou ante os eurodeputados que a UE conta co maior mercado único do mundo e a forza para negociar e para contraatacar. "Os cidadáns de Europa deben sabelo: xuntos promoveremos e defenderemos sempre os nosos intereses e valores e sempre defenderemos a Europa", apuntou.

Potenciar o mercado único

Von der Leyen apostou por sacarlle toda a potencia que ten ao Mercado Único e asegurou que a receita contra os aranceis estadounidenses tamén pasa por redobralo e retirar obstáculos ás transaccións no seo da UE.

"O mercado único é a pedra angular da integración e os valores europeos. É o noso poderoso catalizador do crecemento, a prosperidade e a solidariedade", sinalou, e defendeu retirar barreiras que existen no Mercado Único para contar cun máis grande, que vaia rápido e lonxe.

Por iso anunciou que Bruxelas presentará o mes que vén máis propostas para simplificar o funcionamento do Mercado Único, concretas e audaces, para eliminar algunhas destas barreiras e evitar outras novas, que, segundo dixo, equivalen a un arancel do 45 % para as manufacturas e do 110 % para os servizos en Europa.