Sánchez reúnese con empresarios e sindicatos e comparecerá para dar unha resposta aos aranceis de Trump

O presidente do Goberno Pedro Sánchez reúnese este mércores pola tarde con representantes dos empresarios e os sindicatos no complexo da Moncloa co obxectivo de analizar a conxuntura xeopolítica actual no marco dos aranceis anunciados polo presidente estadounidense Donald Trump.  Sánchez, presentará este xoves a mediodía o plan de continxencia que está a preparar o Executivo, nunha comparecencia ante representantes do sector produtivo e industrial.

Segundo recolle a axenda do Goberno, na tarde deste mércores Sánchez reunirase cos presidentes de CEOE e Cepyme, Antonio Garamendi e Gerardo Cuerva, e os secretarios xerais de CCOO e UXT, Unai Sordo e Pepe Álvarez.

O presidente da patronal di que hai que responder desde Europa á política comercial dos Estados Unidos.

 

Así mesmo, estarán presentes a vicepresidenta segunda e ministra de Traballo e Economía Social Yolanda Díaz, o ministro de Industria e Turismo Jordi Hereu, o ministro de Agricultura, Pesca e Alimentación Luis Planas e o ministro de Economía, Comercio e Empresa Carlos Cuerpo.

Cuerpo, aseguraba que Europa ten ferramentas para responder a medidas "inxustas" dos Estados unidos como o veto a Repsol. Quixo mandar unha mensaxe de "confianza e de tranquilidade" para empresas, traballadores e industrias, neste caso a Repsol, e confía en que se poida chegar a un acordo coa Administración Trump.

Pola súa banda, Hereu asegurou este mércores que España e Europa están "a preparar a resposta" aos aranceis.

"Tanto España como Europa non queremos escalar a guerra comercial, non cremos nas guerras comerciais porque é evidente que todos saímos perdendo", dixo en Barcelona antes de entrar ao 'Tourism & Economy Summit'.

Así mesmo, valorou que os aranceis tamén prexudicarán a Estados Unidos: "En todo caso todo pinta que para eles non é un día da liberación porque isto conleva depresión económica e graves problemas políticos".

A vicepresidenta segunda e ministra de Traballo, Yolanda Díaz, mandou unha mensaxe de "serenidade" aos sectores onde podería haber un maior impacto polos novos aranceis de Estados Unidos e asegurou que "o Goberno vai salvalos", como se fixo en pandemia.

"O Goberno de España vai salvar aos sectores afectados e imos salvar aos traballadores. Imos facer o correcto", recalcou a titular de Traballo, á vez que recoñeceu que España non é un dos países que se verá máis afectado por estes novos aranceis.

A Casa Branca ratifica que entrarán en vigor "de inmediato"

A portavoz da Casa Branca Karoline Leavitt reiterou este martes que os novos aranceis anunciados por Trump para o mércores entrarán en vigor de inmediato e pediu paciencia aos estadounidenses ante o previsible aumento dos prezos.

Pola súa banda, Sánchez xa anunciou a semana pasada que o Executivo está a preparar un plan de continxencia para axudar aos sectores que se poderían ver afectados polos aranceis de Estados Unidos, e insiste en que non é desexable unha guerra comercial pero Bruxelas, que é quen ten as competencias comerciais, dará a resposta necesaria.