Montero pídelle ao PP "un cambio de actitude" para consensuar o novo modelo de financiación autonómica

A vicepresidenta primeira do Goberno e ministra de Facenda fai un chamamento ao Partido Popular para poder acordar entre os dous grandes partidos un novo sistema de financiamento autonómico. María Jesús Montero advirte de que o novo modelo "non pode ser un traxe á medida", polo que pide un cambio de actitude para poder poñer de acordo ás comunidades autónomas.

"Somos nós quen temos que construír ese deseño e poñer de acordo ás comunidades autónomas", indicou nunha comparecencia no Senado, "Paréceme máis sinxelo poñer de acordo aos dous partidos xeneralistas con presenza en toda España e non a partidos que se limitan á defensa do seu territorio".

Montero aclarou que a condonación dos 83.252 millóns de euros de débeda das autonomías aprobada no Consello de Política Fiscal e Financeira do pasado 26 de febreiro require ser plasmada nunha lei orgánica. O obxectivo, afirma "é aprobala o antes posible".

A ministra indicou que "xa empezamos a manter contactos bilaterais con tódalas comunidades autónomas" pero confía en que acudan a esas reunións -que cualificou de "técnicas e non políticas"- con ánimo "construtivo" e "non se levanten da mesa aos cinco minutos", como xa sucedeu con algunha comunidade autónoma. María Jesús Montero aproveitou a súa comparecencia na cámara alta para facer un chamamento á responsabilidade.

Montero pediu altura de miras ao Partido Popular e tamén aos distintos territorios para consensuar "unha proposta común".  Insta ás autonomías a "abandonar as posicións de máximo", xa que non se trata, dixo, de confeccionar "un traxe á medida para ningunha delas".

A ministra nega "privilexios nin agasallos a un territorio fronte aos demais". "Non hai nada de cesión bilateral ou chantaxes", afirma. "Animo a ter un debate serio, construtivo e non descualificativo que non conduce a ningún lado".