Xoves negro nas bolsas, arrastradas pola guerra comercial iniciada por Trump

Caída xeneralizada nas bolsas de todo o mundo tras o  anuncio do presidente dos Estados Unidos de aplicar fortes aranceis de forma xeneralizada.

A Bolsa española perdeu este luns un 1,19 % e retrocedeu ata os 13.191,2 puntos

O principal índice da Bolsa española, o IBEX 35, cedeu 159 puntos nesta sesión.

Dos grandes valores destacaron as perdas do 5,35 % de Repsol e do 5,2 % de Banco Santander, cuarta e quinta maiores do IBEX, respectivamente, en tanto que Inditex cedeu o 2,11 % e BBVA o 1,53 %. Iberdrola gañou o 3,19 % (cuarta empresa máis alcista do IBEX), e Telefónica o 2,24 %.

 A Bolsa de Milán desplomouse un 3, 60%

Pechou nos 37.070,83 puntos.

Pola súa banda, o índice xeral FTSE Italia All-Share caeu un 3,51%, ata os 39.245,26 enteiros.

A compañía con peores resultados en Milán foi Tenaris, cunha baixada do 9,85 %, á que seguiron Saipem (9,02 %), Stmicroelectronics (8,32 %), Stellantis (8,06 %), Brunello Cucinelli (7,65 %), Intesa Sanpaolo (6,96%), Unicredit (6,96 %), Banca Popolare Sondrio (6,94 %), Bper Banca (6,50 %) ou Prysmian (6,28 %).

O principal índice da Bolsa de París, o CAC-40, caeu o 3,11%

O fabricante de semiconductores STMicroelectronics (-8,41%) e Stellantis (-8,12%) encabezaron as perdas. 

O DAX cae un 3,08%

En Alemaña, p índice DAX 40 perdeu un 3,08 %, ata 21.700,36 puntos, mentres o tecnolóxico TecDAX baixou un 3,95 %, ata 3.470,92 puntos.
O fabricante de artigos deportivos Adidas baixou un 11,7 %, ata 195,10 euros, porque deberá incrementar os seus prezos para compensar o efecto dos aranceis, que serán moi elevados porque fabrica en países do sueste asiático aos que Trump vai impoñer aranceis especialmente altos.

O grupo industrial e tecnolóxico Siemens perdeu un 8 %, ata 197,48 euros, tamén porque os investidores consideraron que a compra de Dotmatics, empresa de software para investigación e desenvolvemento en ciencias da vida, por 5.100 millóns de dólares foi moi cara.

A súa filial de tecnoloxía sanitaria Siemens Healthineers perdeu un 7,1 %, ata 46,52 euros, o fabricante de equipos de laboratorio Sartorius caeu un 7,4 %, ata 199,25 euros, mentres o fabricante de semiconductores Infineon cedeu un 8 %, ata 28,16 euros.

Londres baixa un 1,55%

O índice principal londiniense, o FTSE-100, baixou 133,74 puntos ata 8.474,74 enteiros, mentres que o secundario, o FTSE-250, retrocedeu un 2,23 %, ou 439,12 puntos, ata as 19.210,51 unidades.

A banca aglutinou as maiores caídas, co banco británico Standard Chartered, con operacións en máis de 70 países, como principal prexudicado tras perder un contundente 13,32 %, seguido da multinacional de servizos financeiros HSBC, que retrocedeu 8,87 %, e Barclays, que se deixou un 8,71 %.

Tamén rexistraron fortes perdas o fondo privado de investimento Intermediate Capital Group (8,16 %), a multinacional de embalaxe e papel Mondi (7,95 %) e o comerciante polo miúdo de roupa e calzado JD (7,98 %).

A Bolsa suíza pecha con perdas do 2,5 % 

É a reacción ao anuncio de aranceis xeneralizados polo presidente dos Estados Unidos, Donald Trump, que serán do 31% ás importacións procedentes da economía helvética.

O SMI, principal referencial da bolsa zuriquesa, situouse en 12.274,22 puntos ao final da xornada de cotización, 314,09 menos que no peche do mércores.

Caídas xeneralizadas tamén nos mercados asiáticos

Pero antes de que comezase a xornada nas bolsas europeas, xa os mercados asiáticos deixaban claro por onde ían as cousas. A medida anunciada por Trump, non por prevista menos impactante, golpeou con forza.

O principal índice da Bolsa de Toquio, o Nikkei, caeu un 2,77 % este xoves, tras o anuncio de "aranceis recíprocos" por parte do presidente dos EUA, que no caso do Xapón serán do 24 %. As maiores perdas no mercado toquiota foron os das empresas do sector dos semicondutores e os fabricantes de automóbiles.

En Shanghai, o índice de referencia perdía un 0,24 % e a de Shenzhen un 1,4 %. En Seúl a bolsa caía case un 1 %, e en Hong Kong a baixada superaba o 1,5 %.

Wall Street inicia a sesión con fortes perdas e mantenas a media sesión

E a agardada apertura das cotizacións de Wall Street tampouco esquivou esas caídas. Os futuros alertaban xa sobre unha sesión negativa, e nos primeiros compases do día o retroceso no Dow Jones xa retrocedía un 3,6 % e o Nasdaq deixaba polo camiño máis dun 5 %.

A media sesión Wall Street mantíñase en perdas. O índice tecnolóxico Nasdaq caía un 4,5 %.

Ás 12.30 horas locais en Nova York (16.30 GMT), o Dow Jones baixaba un 2,65 %, ou 1.117 puntos, e o S&P 500 cedía un 3,39 %, froito de vendas masivas en case todos os sectores.

 Wall Street pechou con fortes perdas que oscilaron entre o 4 e o 6 % nos seus principais indicadores.

Segundo datos provisionais ao terminar a sesión, o tecnolóxico Nasdaq caeu un 5,97 %, o selectivo S&P 500 perdeu un 4,84 % e o Dow Jones de Industriais cedeu un 3,98 %, coas maiores perdas nas empresas de enerxía, tecnoloxía, industriais ou financeiras.

O prezo do petróleo intermedio de Texas (WTI) pechou cunha caída do 6,64 %, ata os 66,95 dólares o barril, lastrado polo anuncio sorpresa da OPEP+ dun aumento na súa produción e os aranceis anunciados onte polo presidente de EEUU, Donald Trump.

Ao peche na Bolsa Mercantil de Nova York, os contratos de futuros do WTI para entrega en maio restaron 4,76 dólares con respecto á última sesión.

Oito nacións da Organización de Países Exportadores de Petróleo e Aliados (OPEP+), entre elas Arabia Saudita, Rusia e Iraq, informaron  de que aplicarán un incremento na súa produción de cru de 411.000 barrís diarios en maio.