Os aranceis de Trump golpean o viño, a automoción, o téxtil e o granito en Galicia
Adegas das Rías Baixas teñen paralizados os envíos de milleiros de botellas de albariño
As empresas de compoñentes da automoción temen que os fabricantes reduzan pedidos
Rueda prevé un impacto menor en Galicia polos novos aranceis dos Estados Unidos
Xa sabían o que podía pasar. Moitas empresas galegas levan semanas asumindo unha posible imposición de novos aranceis nos Estados Unidos. Nalgúns sectores, como o do viño, tiñan a experiencia do primeiro mandato de Donald Trump.
O viño é, precisamente, un dos negocios onde hai máis preocupación porque, para varias adegas galegas, Estados Unidos é o principal mercado de exportación e representa ata o corenta por cento das súas vendas. En todos os sectores hoxe a mensaxe é semellante: prudencia e unha petición aos gobernos, tanto ao Central como á Unión Europea, para que traten de chegar a un acordo que minimice os danos.
En Galicia, o golpe vai por barrios. Nas Rías Baixas, varias adegas da Denominación de Orixe teñen paralizados os envíos de milleiros de botellas.
"Agora mesmo temos parados tres contedores con preto de sesenta mil botellas", explica Iván Gómez, o director de Altos de Torona.
En xeral, hai moita preocupación na industria agroalimentaria española xa que os Estados Unidos son o principal destino das exportacións fóra de Europa. Dende a Coordinadora de Organizacións de Agricultores e Gandeiros alertan contra posibles intentos de aproveitar a situación.
"Non imos tolerar que ningún elo da cadea agroalimentaria especule con isto e utilice os aranceis para meter presión para unha baixada dos prezos que se pagan no campo", advirte o secretario da COAG, Miguel Padilla.
Outro sector en alerta é a automoción. Se ben as vendas directas de Galicia aos Estados Unidos son escasas, tanto de vehículos terminados como de pezas, as empresas de compoñentes temen que os fabricantes europeos recorten pedidos se venden menos coches aló.
"No sector do metal temos experiencia dabondo. Practicamente máis do 70 por cento da nosa produción vai ao estranxeiro e desa porcentaxe o 40 por cento vai fóra da Unión Europea e por tanto temos experiencia na busca de novos mercados", asegura Enrique Mallón, da patronal Asime.
E tamén hai preocupación no téxtil e no sector do granito, que envía aos Estados Unidos o 25 por cento das súas exportacións.
"Aínda que no volume de exportacións da provincia de Pontevedra Estados Unidos representa arredor do cinco por cento, iso é de media. Haberá sectores ou empresas especialmente expostas, nas que o 30 ou 40 por cento das súas vendas ao exterior son no mercado norteamericano", resume o presidente da Confederación Empresarial de Pontevedra, Jorge Cebreiros.
