Os membros da UPA lideraron en Galicia máis de 800 operacións contra o furtivismo en 2024
Nunha das operacións máis importantes decomisaron máis dunha tonelada de marisco
Só no marco da operación Capilla, en colaboración coas forzas de seguridade de Portugal, os axentes da UPA comisaron máis dunha tonelada de marisco e conseguiron desartellar unha rede internacional dedicada ao furtivismo.
"Son grupos totalmente organizados, onde existe unha estrutura, hai conexións internacionais... Estamos falando de organizacións que obteñen un gran rendemento económico. Unha vez extraído o marisco de xeito ilegal, gardábano nestas depuradoras, falsificaban a documentación e xa a etiqueta, con esta documentación falsa introducíano no mercado co conseguinte risco para a saúde, posto que carecía de calquera tipo de control sanitario", explicou César Ramos, inspector xefe de ERPOL.
25 axentes están destinados neste grupo. Coa axuda dos de Operacións Subactuáticas liberan especies en veda,nun esforzo por atallar delitos que atentan contra a biodiversidade e que teñen ademais grande afectación económica no sector marisqueiro.
"Facemos reunións co servizo de Garda Costas de Galicia para organizar os dispositivos. Sempre se buscan zonas máis sensibles, mareas máis propicias. Facemos un labor constante para o que é moi importante a colaboración cidadá", detalla César Ramos, inspector xefe de ERPOL.
O seu traballo rematou o ano pasado con 227 denuncias e 24 persoas detidas por un delito, o furtivismo, recollido no Código penal e castigadas con ata máis de dous anos de prisión.
