O dono de Sargadelos comunica que non haberá despedimentos e prevé reabrir a semana que vén
A Xunta pídelle a reapertura inmediata da planta e a Inspección de Traballo que sexa flexible
Os sindicatos falan dun peche patronal ilegal e inxustificado
O conflito entre o dono da emblemática firma de cerámica Sargadelos, Segismundo García, e a Inspección de Traballo, motivado por deficiencias que chegaron a ocasionar problemas de saúde en traballadores da planta, atópase en vías de solución tras entrar a mediar a Xunta, a través do conselleiro de Emprego, José González.
García, comunicou ao persoal que non hai nin haberá despedimentos e que prevé que a semana que vén volvan traballar na fábrica, que este xoves pechou no medio dun conflito coa Inspección de Traballo.
Diso informaron os propios traballadores aos medios de comunicación e a representantes sindicais á saída dun encontro con García.
A reunión tivo lugar tras unha mañá na que os traballadores se atoparon coas portas da factoría pechada. Este mércores, Segismundo García comunicou á Inspección de Traballo que pecharía a fábrica ante as deficiencias detectadas no ámbito da seguridade laboral.
Ao saír da cita co dono de Sargadelos, os traballadores informaron de que lles dixo que ningún está despedido nin prevé despedilos, pero pediulles tempo para negociar unha saída ao conflito.
Segundo indicou, o máis probable é que a semana que vén poidan volver entrar a traballar, e insistiulles en que non estaban a traballar "pola súa seguridade", pero pediulles que estivesen "tranquilos".
Pola súa banda, os traballadores decidiron en primeiro lugar quedar ata as 15:00 horas este xoves -que é cando acaban a súa quenda- e volver este venres á súa hora -as 7:00 horas- "para cumprir" e que ninguén lles reclame que non estiveron no seu posto de traballo.
Así mesmo, sinalaron que non vai haber denuncias porque confían en que acabe chegando unha solución para o futuro da planta.
Segismundo García trasladoulles que negociará tamén, ademais de con o conselleiro de Emprego, José González -con quen xa mantivo conversacións este xoves-, con Inspección de Traballo, que foi a que advertiu das 36 deficiencias que había que liquidar na fábrica.
.png)
